期指結算日大市走勢反覆，尾市轉弱，但升股（不計認股證）同跌股數目相若，濠賭概念股則個別發展。恒指收市14163，跌102點，成交177億元。1月期指收14119，跌166點，低水44點。
國企掉頭，國指收4708，大跌78點，主要係幾隻「大孖沙」都有較大跌幅。傳美國證監會正式向中國人壽（2628）展開調查，國壽應聲下跌，收5.15元，跌0.25元，連帶中國平安保險（2318）亦跌0.30元，加上兩大石油股中石油（857）同中石化（386），以及中國電信（728）都回落，國指遂一次過跌穿10日、20日同50日3條平均線，大勢明顯轉淡。北京燕化（325）私有化，早段為石化股帶來一陣子刺激，噚日推介嘅中石化冠德（934），以1.27元高收，升8仙。
濠賭概念股上升嘅有邁特科技（1031）升5.4%、新濠（200）升6.5%、英皇系的英皇中國（296）升12%同英皇國際（163）升5%，祥泰行（199）同豐德麗（571）更分別大升60.9%同50.6%。
市場繼續追捧概念股，每日都有新秀登場。
噚日名列10大上升榜的冠中地產（193），由2.4仙搶到上3.1仙最高收，升幅29.1%，成交更激增到8.9億股，翻查紀錄，呢幾年都未見過咁賓虛嘅場面。冠中大升，有消息又係同「濠」有關。冠中嘅關連人士係邊個，大家都心中有數，早前隻永安旅遊（1189），曾有3日之內由2仙升到5.8仙嘅紀錄，冠中若確實染「濠」，好大機會重演大升嘅場面。
事實上，冠中「晒士」細細，又乾淨，對於有心要大展拳腳嘅人而言，實在係好吸引。冠中發行32.69億股，噚日股價大升後，市值重只係剛好1億元，而市價又同每股資產淨值相若，有心人一收上手，立即可以做工夫。
睇走勢，由今年2月開始，冠中形成一個大圓底，噚日以大成交升破頸線阻力，照度上去，中線目標可指向4.4仙。
信德（242）係濠賭股龍頭，見大戶開始有動作，噚日最高掃到上8.75元，後跟大市回軟，收8.55元，仍升5仙。大戶部署收集咁耐，聽講目標係要翻一番，只要收市升破8.70元阻力，即可追進，短線可在11元回吐，中線睇16元。
郭兆誠