過埋今日，二○○四年就成為過去，回顧住宅樓市，脫胎換骨，睇番十二個新入伙屋苑，二手買賣活躍，最多人買嘅，原來唔係市區屋苑，竟然係元朗上車盤YOHOTown，共四百九十三宗二手買賣登記，贏第二位長沙灣泓景臺三十七宗。
中記周子立話，YOHOTown受西鐵通車效應刺激，加上第二期又會喺○五年開賣，所以吸引唔少投資者入市，比例達三成，唔怪得成交量咁多！沽出單位嘅，全部都獲利。
蘭西睇番每個月嘅數字，發現有五個屋成交喺十一月創新高；而全月共有四百零七宗，都係今年單月新高，佔全年總數一成八。長沙灣泓景臺同土瓜灣傲雲峰，都錄得超過九十宗登記，平均一日有三宗，認真旺場。
盈大薄扶林貝沙灣，今年不但取得本港同埋海外頒發嘅獎項，銷售成績亦算唔錯，年初賣到年尾，賣樓收益近九十億。盈大噚晚喺貝沙灣現場博覽館，設宴答謝地產代理過去一年幫手推銷，筵開八席。
聽聞，盈大準備咗唔少禮品做抽獎，包括名牌Bvlgari手表，同埋五天東京豪華旅遊，獎品都算重手。
貝沙灣今年先後舉行過多次晚會，唔少重聯同國際級品牌一齊舉行，打響知名度，更獲法國報章評選為香港最具代表性嘅豪宅物業。
今年係地產代理豐收年，過埋今日，就正式踏入新一年，中記利記噚日總結業績，齊創九七後新高。
中原董事總經理黃偉雄話，預計本月營業額有一億三千八百萬，全年十八億五，比舊年九億八，多近九成。黃偉雄話，雖然今個月一手市場比較靜，不過有二手成交支持，整體生意一樣咁好，嚟自二手代理嘅營業額，佔咗八成二，係樓市健康表現。
至於利嘉閣，今個月營業額約為三千八百萬，全年應可達四億六千萬，較去年嘅二億八千萬，增加六成四。
年近歲晚，仍不乏大額交易，市傳Toppy集團方氏家族，以超過三億，買入中環前國華銀行大廈全幢，經手人係曾經獨家代理嘅第一太平。
一太負責人噚日話，不便評論有關消息，令傳聞更加似層層。
唔少曾經跑過個盤嘅經紀，言之鑿鑿咁話，業主證實有買家畀到三億有多，個價好到難以抗拒，於是過年前決定出售。
呢幢中環地鐵出口兼業權統一嘅寫字樓，放盤成年，估唔到以超理想價售出，以樓面三萬五呎計，一呎要八千六，拍住甲級寫字樓。
上月易手嘅雲咸街八號，呎價不過六千七、八，今次個買家真係勇字當頭。
電郵地址：
