我求大俠早前提到中國球員申思會飛去西班牙參加罰球大賽，結果終於有咗，呢位中國代表最終首輪分組賽落敗，但因為碧咸、卡路士臨時甩底，可以候補資格入圍。
首輪分組賽將二十名參賽球員分成五組，每名球員要喺十八、二十一同二十五碼三個距離嘅罰球點、分左中右位置處理罰球；即每名球員要主射九次，再計算最終得分，定出小組首名出線資格。
申思被安排於第四組，把守住大門就喺華倫西亞嘅簡尼沙尼斯，結果申思九次主射，有省中人牆、有俾簡尼沙利斯接住；最後喺二十五碼位置射入一球，無緣入決賽。
不過，賽會稍後收到通知，話直接入決賽嘅碧咸同卡路士甩底，申思最後入到決賽，真係幸運。
水晶宮前鋒安迪莊臣近期入球產量少咗，但無損佢喺球員轉會市場嘅受歡迎程度，成為搶手貨。水晶宮領隊杜維就表明安迪莊臣係非賣品後，依然有好多人打電話畀佢，問羅致呢位射手可能性，搞到杜維決定熄埋手提電話，希望其他領隊手下留情，唔好再打電話畀佢。
傑斯近期成為曼聯贏波功臣，估唔到呢位威爾斯國腳被英國球迷選為今年度英超最美臀先生，就連傑斯自己本人都唔敢相信。傑斯覺得自己攞呢個獎唔係俾人挖苦，反而係一種榮幸；雖然佢無親自去領獎，怕球迷要求當眾除褲，但就唔介意着條緊身牛仔褲畀球迷影相留念喎。
年尾各地足球先生名單陸續揭盅，拉素前鋒彭迪夫榮膺馬其頓足球先生，AC米蘭嘅舒夫真高除咗早前攞咗歐洲足球先生之外，日前順利由多個前蘇聯國家合共選出為足球先生；佢嘅隊友湯馬臣就當選丹麥足球先生。求大俠對湯馬臣當選有質疑，愛華頓加維臣今年搶鏡得多喎！
我求大俠日前幫同事回顧○四年球圈大事，諗到甘波斯、巴治奧及羅馬尼奧呢啲一代名將，終於告別球壇；話口未完，羅馬里奧又話想復出加盟前度球會華斯高！呢位巴西前鋒過去幾年話退休好多次，次次都得個講字，難為人哋重幫你搞埋告別賽，太迷戀英雄地何苦呢㖭。
逢周一至周五見報