期指結算日，個市唔多好睇，1月期指更加低水44點。以前試過好多次，傳統智慧係期指低水主凶多過主吉，但實際往往相反，唔使太擔心。
中銀C輪9573：中銀（2388）曾經郁過吓，最高15.10元，最低14.80元，收14.85元，全日埋單冇起跌。
中銀C輪9573喺正股彈升0.25元之時，高見3.9仙，較全日低位2.4仙高出63%，收3.1仙，升19%，唔係乾炒，有5.73億份（佔發行量57%）易手，銀碼2千粒。隻輪明年2月到期，溢價9.8%，槓桿率47.9倍（有效13.9倍），引伸波幅30.7%。睇引伸波幅，爆炸到飛起，不過溢價絕對唔便宜。玩呢隻輪，要當玩死亡遊戲，預咗輸嚟炒。當然，如正股忽然好短時間內起一蚊幾毫，隻輪嘅變化會好犀利。
正股有勢，正路始終係搞9169，屆滿日遲過9573少少，輪價25仙，溢價0.2%，槓桿率5.9倍（有效5.7倍），引伸波幅25.8%。到明年2月，如果正股升10%，揸9573打和，但揸9169則賺58%。
新地C輪2252：新地（016）最高78.50元，收77.25元，跌0.25元。熱門C輪2252最高51仙，收46仙，跌2仙，博反彈，買2252，明年2月到期，溢價1.7%，槓桿率16.8倍（有效11.8倍），引伸波幅23.90倍。
國壽C輪4534：英國《金融時報》引述消息，話美國證監正式對國壽（2628）展開調查，國壽收5.15元，散25仙，所有C輪散到七個一皮。國壽掛牌1年有多，查嘢事件亦係舊聞，估計國壽好快彈番上去，博C輪反彈，細注買4534。
章盛