前日係西班牙嘅「愚人節」，國民喺呢日可以肆無忌憚講大話整蠱人，即管由我求大俠報道吓當日傳媒發放嘅幾則球圈新聞，一齊判斷下真確性。
皇馬準備用奧雲、活基治及森美爾三人，同巴塞交換伊圖！呢個似乎係同皇馬主席佩雷斯開嘅大笑話。奧、活及森三人都係今季簽入，而伊圖就係季前賣走畀巴塞嘅，如果係真嘅話，佩雷斯都算世上最敢於認錯嘅人囉。
哥迪奧拿、安歷基及祖迪告魯夫回歸巴塞，紓緩球隊傷兵多致兵源不足壓力！據講哥迪奧拿目前同卡塔爾球會嘅合約上，係有條文話若有歐洲球會搵佢，可以隨時走人；安歷基及祖迪告魯夫都係自由身，一齊返巴塞補番啲中、前場位置都唔係無可能嘅；點解唔話皇馬搵番保頓嘅甘保及希亞路返去救亡呢？
車路士準備搵埋貝迪斯主將祖亞昆過檔嘅消息傳得鬧哄哄，雖然祖亞昆本人及貝迪斯會方俱已表態，呢單交易唔會喺一月轉會期內成事；但該隊門將杜巴斯日前爆料，話祖亞昆已經學緊英語！如果係真嘅話，大家都意識到呢隻快馬，就算一月唔走，來季都過梗英超搵食啦。
愛華頓喺前晚賽事，作客查爾頓終於錄得近八場聯賽首敗，輸○比二。「長人」鄧肯費格遜例牌喺尾段後備上陣，點知入場唔夠十分鐘，就因為向查爾頓後衞靴達臣打踭被逐離場，賽後重俾領隊莫耶斯罰款七萬鎊（約一百萬港元）！好心鄧肯費格遜你收吓火啦。
洛賓喺前晚英超聯射入為車路士取得領先，入波後呢位𡃁仔又成為另一個當國際足協條例無到嘅人，就係除衫慶祝，然後領咗張黃牌！不過賽後領隊摩連奴，又無好似其他領隊咁責怪佢喎；梗係啦，洛賓喺「車仔」地位今時唔同往日，隊波又夠人，就算停賽咪當畀佢休息下囉。
今日喺勒邦占士二十歲生日，但淨睇佢嗰樣，同埋六呎九吋、二百五十磅嘅魁梧身形，真係好難相信佢連買啤酒嘅合法年齡都未夠。唔講唔知，原來占士喺小學開始，凡參加比賽都會帶埋身份證，因為佢生得高大，技術更高出同輩幾班，所以經常要出示身份證明自己冇超齡。
逢周一至周五見報