今年二十四歲嘅日本女星竹內結子，自上年初同萬人迷木村拓哉合演富士電視台「月九」日劇《PRIDE》扮演刁蠻惡女之後，近期同男星中村獅童合演嘅新片《現在就去見你》喺日本大收，令扮演賢妻良母嘅結子成功攀上一線女星嘅位置。結子嚟緊下月將會一個人孭飛演出新一季「月九」劇集《不高興的遺傳因子》，睇得出電視台對佢相當器重。我大口羅拉近日就搜刮到一批結子讀書時嘅相片，原來佢細細個嘅時候竟然成個男仔頭咁款，入咗行之後，先咁有女人味。
男仔頭性格嘅結子自細已經鍾意剪短頭髮，而且愈大愈短，不過個樣同𠵱家分別唔大。據結子小學好友爆料，一般日本小學女生大多數都會參加網球或者排球之類嘅課外活動，但係結子就揀咗參加唔多受女仔歡迎嘅漫畫研究會。不過唔好以為結子份人好文靜，原來佢最鍾意嘅運動係足球，每日放學後都要落球場踢番場波至安樂。
直至升上中學，結子嘅爽朗性格依然冇變，喺佢參加校外宿營之後所寫嘅作文中，結子唔單止大讚自己親手整嘅咖喱好味，又為咗爭兩日圓買唔到佢心愛嘅朱古力而大動肝火，認真為食。