今年樓價急漲，成交大增，代理界大豐收，均積極擴充分行，都以人流旺，或者交投多嘅屋苑為選址。不過，細行晉誠地產，就揀選交投靜嘅葵涌華景山莊開設第三分行。
晉誠張秋對蘭西話，華景確實成交唔多，每個月得嗰四五宗，但係唔少業主已經「供滿」，好大換樓潛力。晉誠就係睇中呢點，至喺呢度開分行。因為明年唔少新盤開賣，可以射客買外區新盤。
另外，屋苑現時只得中美兩大行，晉誠變成第三勢力，希望可以搶佔到三分一佔有率。重有一個原因，係屋苑商場靜，租金自然平！咁成本咪輕啲囉。
呢間分行約二百呎，月租一萬，員工五至六個，只要做到幾單成交，已經可以維到皮。
佢希望，一年營業額可以有四百萬。
中記報告，今個月樓宇買賣預料只得一萬零五百宗，比上月少兩成三，但總值六百四十五億，增四成半，今年最高。
近個零月，樓市偏靜，大手買賣唔多，買賣總值竟然可以創新高，原來因為房委會商場同停車場，賣咗畀領匯。
嗰度已經值三百二十億，佔一半，所以形成宗數減總值增唔協調現象。
扣除房委會呢項交易，今個月登記，價值最高係中環會德豐大廈地下A舖，作價三億九，中環荊威廣場商場則兩億八。至於長沙灣金華大廈地下舖位，原來都值二億三。
業主「無心插柳」，結果賺到錢嘅情況，間中也有所聞，好似香港仔興偉中心二十六樓，就係例子。
中原蘇光銓話，上址面積逾二萬七千呎，今年九月，由廠家動用一千一百二十七萬購入。
廠家原本打算自用，後嚟因為佢公司資源調配，用唔着層樓，點知咁啱，又有客想買，於是順水推舟，以一千二百一十七萬賣出，執到九十萬，套番筆資金畀公司用。
深圳地鐵剛通車，地產代理之前已經大賣地鐵概念，好似深圳逸軒，代理中記話，上個禮拜銷量較前周大增五成，認購登記三百個，增一半。其中一個港客，大手入票五十張，可能涉資二千萬。
深圳逸軒，截至今個月二十六號，暫收千五個認購登記，較推出單位超額十倍。
中記話，以現時羅湖區一房一廳單位，月租二千八計，回報有十厘，但地鐵通車後，估計可以達十五厘。因此，地鐵概念，短期內可以成為推高樓價嘅因素。
有錢人買嘢，心態同一般人唔同，好似住宅咁，都以為用嚟自住或收租。原來有人諗住買嚟收藏，當正古董一樣。
利嘉閣郭兆輝話，火炭晉名峰D座中層B室，近千二呎，剛以九百四十萬成交，呎價近八千，屬於市價，佢話，買家經營水晶燈批發生意，買入呢個單位，純粹作為收藏。蘭西好奇想知，買家會唔會入住呢個單位呢？
不過，原業主以八百二十六萬購入，持有一個月，賺咗一百一十四萬，近一成四，認真和味。
電郵地址：
