無綫高層樂易玲日前與家人共二十人在泰國布吉島遇上海嘯，被滔天巨浪捲入海中，她與兒子及後靠抓着大樹避難，但仍不斷有高十米的巨浪湧過來，幸好未被捲走。樂易玲昨日憶述事發經過仍猶有餘悸，但她呼籲在泰國的港人不要放棄。
無綫製作資源部副總監、即鍾鎮濤的舊愛樂易玲，在聖誕節假期與家人前往泰國布吉島度假，不幸在當地遇上海嘯，幸好全家人安然無恙，樂易玲前晚深夜由曼谷乘飛機抵港，其妹夫則須送港醫院留醫。昨日樂易玲接受無綫《香港直播》訪問，憶述與家人逃難經過，歷險過後的她難掩驚慌。
樂易玲口震震地說：「海嘯發生時如果成家人重喺酒店或者海灘，已經死咗，當時早上九點幾，我哋一家二十人分坐兩架木船出海睇珊瑚，突然見到海嘯發生。當時我哋距離岸邊一百米左右，兩隻船散晒，我哋喺巨浪頂，啲浪將我哋拖落海底又上番嚟，好在我哋有着救生衣，先可以生存到，可能個海好深，我哋冇撞擊到嘢。後來我哋被沖到一個島，我攬住個仔抓住棵樹，當時餘波重有大約六個十米高嘅浪冚埋嚟，直至啲浪低番啲我哋先再搵番失散嘅親人。」
樂易玲形容當時逃亡如走難一樣，見路就跟人走，走了五處地方才找回親人，逃到高地時已是傍晚六時多，她說：「我哋跟住村民走，沿途見到好多死屍，啲泰國人好好，會分一半食物畀我哋，我哋一直走，沿途見到啲鞋同衫就執嚟着，唔理得係乜嘢size。走到高山地方，山上已經有千幾人，有啲已經死咗，喺山頭上大家圍住火堆，只聽到有人喊，有人笑，等第二日軍機嚟救大家去醫院，喺醫院見到死嘅死傷嘅傷，然後就獲安排去布吉機場再去曼谷，再經過登記返香港。」
樂易玲經歷過世紀災難後有感而發說：「我哋一家人剩下嚟，一生已經賺番，我哋唯一完整嘅家庭，餘生最重要係快樂知足，條命係最寶貴，日後做人都要對得住天、地、人，快樂健康，今日唔知聽日事。」樂易玲又呼籲仍身在泰國的人不要放棄。
此外，樂易玲透過無綫外事部向外界致謝，多謝大家關心，現階段希望爭取休息，會盡快返回工作崗位。
