江芷妮舊年分別同「玩具大王」蔡志明以及蔡志明嘅姪仔蔡加頌（Gary）傳緋聞，之後就被踢爆忽然富貴。江芷妮喺無綫嘅人工大約一萬蚊左右，但就揸寶馬跑車、住八百幾萬嘅大埔豪宅，近日佢重喺蔡志明旗下嘅物業開埋美容院，睇嚟佢同蔡氏家族嘅關係都好耐人尋味。
江芷妮新開嘅美容院位於銅鑼灣道嘅新國泰大廈前址，呢幢大廈係蔡志明早年購入嘅物業，𠵱家成幢大廈重裝修緊，而江芷妮嘅舖頭亦唔例外，所以近日佢經常留守舖頭打躉，早幾日就有工人送咗屏風同家具到美容院，江芷妮重親自收貨，佢又成日監督裝修工人，成個事頭婆咁款。嗰日江芷妮都係叫快餐店外賣醫肚，飯後落手落腳執垃圾，之後就同位女性朋友去咗附近嘅金行，幫朋友揀金飾。
不過前日江芷妮就解釋，佢話間舖係佢朋友開嘅，自己只係幫手做市場部，重話邊有錢同資格做老細喎。江芷妮又話佢位朋友識得蔡氏家族成員，所以至搵到呢個地點開舖。問佢驚唔驚因為咁再傳佢同Gary拍拖？江芷妮話：「佢已經有啲埋怨我，驚見報呀，人哋有女朋友㗎，再講人哋女朋友會唔開心㗎。」
台灣人氣偶像陳柏霖同梁洛施接拍咗彭氏兄弟嘅恐怖片《見鬼10》，日前佢哋重拍攝咗一輯由監製陳可辛親自構思嘅詭異海報。嗰張海報由一個「無頭運動員」將人頭當作籃球凌空入樽，旁邊嘅觀眾陳柏霖、梁洛施同楊淇，就開住恐怖派對。
吳奇隆同雲南女演員馬雅舒（原名馬婭舒）已拍拖三年，噚日有內地報道話吳奇隆傳婚訊，話佢同女友秘密喺北京登記結婚。前日身在台灣嘅吳奇隆接受傳媒訪問時，被問到結婚一事，即作出否認，重話結婚一定會擺喜酒咁話。
為咗宣傳下個月十三號喺韓國上映嘅《功夫》，周星馳將會喺下月二號飛到韓國宣傳，兼且出席喺四號舉行嘅首映禮。
今次韓國之行，星爺將會同韓劇《巴黎的戀人》嘅女主角金晶銀齊齊為一本韓國時裝雜誌影相，重會同韓國搞笑藝人李瑪利奧見面。
楊紫瓊噚日同男友及幾位外籍友人一齊喺大馬返港，佢提到海嘯天災，都不勝欷歔，楊紫瓊話：「見到啲人咁慘，相信大家都應該識得點做，我都已經聯絡咗大馬政府，睇吓有乜要幫手，都可以搵我，出力嘅出力，我都會捐啲錢幫吓人，做到嘅都會做。」
