日韓興啲乜：<br>韓國易服吧晚晚都係Halloween

日韓興啲乜：
韓國易服吧晚晚都係Halloween

香港濫用藥物人數愈來愈多，唔知係生活無聊抑或係生活壓力太大，要用如此儍仔方法搞喪自己。喺韓國蒲吧就晚晚都可以忘我，今晚可以係吸血鬼，聽晚又可以變白雪公主，總之就唔係變乞自己憎嘅懨悶OL！呢間韓國易服酒吧有專人幫客人變身，晚晚都可以當Halloween咁盡興，時近除夕，韓人重可以入吧玩倒數兼癲番晚，香港夜蒲點不妨學吓！

記者：張銘恩　攝影：陳陶鈞
鳴謝：韓國觀光公社

扮嘢發洩冤屈氣

呢間位於漢城新村的易服吧叫「解熱劑」，個名改得好怪雞，擺到明叫客人入吧發洩日間返工積埋的負能量。「解熱劑」每晚都會舉行化裝舞會，不少韓人嚟到搖身一變，以另一身份玩遊戲、飲酒、跳舞，柴娃娃咁喪玩一夜。據負責人講，來玩的佔90%是韓妹，平日已經好受歡迎，假日更是人頭湧湧熱鬧非常，所以若大家打算在假期前夕來玩兼且睇吓靚女的話，記住早點到霸個好位。

■酒吧位於地庫，店名只得韓文，有心去記住認清楚呢個門口。

專人裝身$40有找

「解熱劑」設化妝間，內有過百款戲服選擇，方便客人裝個靚身兼化妝，個人認為此店最大好處係有專人化妝，兼費用超平只需約$37，只要諗好自己想扮邊個，咁化妝師就會搵套啱你的戲服，然後再因應角色為你上妝，保證扮人似人扮鬼似鬼！不過化妝時有一大忌，化妝師最憎人亂摷佢啲衫，所以大家千祈咪手多多，想扮乜嘢造型同佢講聲就得嘞！
喺間吧入面就晚晚都Halloween，但真實世界並非如此，化到鬼五馬六，大家一定擔心離開時點算？唔使驚，因為呢度有埋落妝間，不過事先聲明都幾簡陋，只提供梘液俾大家落妝，愛美如命的港人可能會唔多慣，不妨帶備個人卸妝用品。

■化妝師每晚「產量」甚多，非常熟手，化個「鬼樣」只需15分鐘。

■化妝間除戲服外，還有各式面具及道具配合造型。

鬼樣直擊

■吸血殭屍與白雪公主，見攝影師一舉機即時交戲，認真Pro！

■巫婆造型非常唔錯，夠晒妖冶邪氣逼人，重有埋掃帚做道具，絕不欺場。

■嘩！塊面咁白，間吧咁黑，夜麻麻見到呢個中國娃娃都咪話唔驚。

■想反傳統唔扮大路角色，可以學呢位小姐做番晚土著，個造型都幾搞笑。

■當晚全場唯一男性，就揀咗做死神使者。

■唔少女生會藉此機會滿足兒時夢想，做個人見人愛的白衣天使。

迷你舞池容納20人

大把人排隊等化妝，未輪到你當然要先搵個靚位坐吓先，酒吧勁黑，地方唔算大，座位數十，有個最多可容納二十多人的迷你舞池，不過蒲得呢間吧嘅韓妹多數志在化妝影相，真正跳舞者不多；現場每晚有DJ打碟，音樂風格以HipHop為主，想聽吓歌飲杯酒吹吓水都得，不過呢度只得佐酒Nuts和小食，咪諗住入嚟開餐醫肚呀！

■化個鬼樣出舞池跳舞，型爆。

■DJ打碟，HipHop音樂令現場氣氛更熱烈。

■超型發光餐牌，幾黑都睇得一清二楚。

■啤酒、雞尾酒與果汁均一價約$37，贈送小食。

全晚高潮化妝互影！

筆者在酒吧逗留了數小時，發現啲韓妹咁鍾意扮鬼扮馬，無非都係為咗影相留念！佢哋一化完妝就即刻攞部私伙數碼相機開始互影、自拍，你影我，我影你，跟住甲同乙，乙同丙，丙又同甲，幾乎酒吧每一個角落都俾佢哋影勻，就咁玩咗一晚，影到夠先坐低飲杯嘢傾吓偈，過一陣又開始影過！好鬼自我陶醉！

■韓妹們興隨身帶住部相機仔，化到咁靚當然要影多幾張相。

■唔扮嘢，一樣可以做回自己埋吧枱吹水，絕對唔會俾人歧視。

解熱劑

地址：81,Nokosan-dong,56-25,Mapo-gu,Seoul
電話：（82）2-322-8955
交通：乘地鐵2號線往新村站下車，再轉乘的士（約$15，車程約10分鐘）直達。
營業時間：平日5:00pm至11:00pm，假日5:00pm至1:00am
註：以上價錢為貨幣兌換約數，$1兌136韓圜。