愈近年尾個市就愈靜，單睇成交大縮就可見一斑，經紀黃建議小初，不如搵一啲基金揸重嘅股份，博佢哋年尾mark高造年結好過。
其中眼鏡股泰興光學（389）一直受芬佬歡迎，自從泰興在月初公布，夥拍美國公司收購美國眼鏡連鎖店後，股價就由當時4元水平升至昨日的5.30元。
經紀黃話，雖然泰興單交易尚未搞掂，但已經有芬佬密密增持，就算泰興大股東亦頻頻增持，甚至在5元樓上高位仍然買緊，反映無論芬佬或大股東，對單交易同埋公司前景甚為樂觀。
澳門賭業概念股繼續標青，其中被傳會染指濠江賭業，但公司多次冇表示的中國星（326），昨日升8.75％，收0.87元，反而個仔豐采多媒體（764），早前急升兩日後，連續第3日急回，噚日再跌14.29％，收3元。
經紀陳話，江湖傳聞呢系股票確係有搞作，中國星已炒作多時，但公司仍無聲氣放出，有可能真係唔關佢事，反而靜咗好耐嘅豐采，突然搞拆細1拆10，似乎有後着。
慕容小初