今個聖誕，意甲一班球星有啲選擇返家鄉省親，有啲就去咗其他國家度假執番條命，亦有人將假期回饋社會，大發善心，各自各「精采」。
國際米蘭嘅馬達拉斯就去咗受到海嘯影響嘅馬爾代夫，幸好據國米會方表示，馬達拉斯已跟球會聯絡上，目前仍在當地等待回國，所以參加唔到周二重新展開嘅操練課。
祖記門將保方及AC米蘭中場加度素，就同時利用假期去探訪家鄉所在地嘅監獄。其中加度素更喺平安夜「拋妻（未婚）棄女」，同班囚犯踢波，成為囚犯足球隊其中一員，對地方球隊踢友賽，結果重幫球隊贏波。睇呢位「鬥牛㹴」外表粗獷，估唔到咁有善心喎！
效力史浩克04嘅巴西前鋒艾列頓呢排真係新聞多多，記得喺上季尾佢同不來梅捧盃後，就應承與同居多年兼生咗兩個女嘅墨西哥女友羅麗達行禮，並定咗喺今個聖誕結婚。點知喺聖誕期間，羅麗達淨係將兩個女送咗去巴西同艾列頓一齊，自己則留喺墨西哥，睇嚟呢次佢有排煩。
曼聯前鋒朗尼涉嫌喺星期日對保頓嘅聯賽中用手推保頓賓咸姆塊面一事，英足總今日會有定案，睇下起唔起訴朗尼。不過，曼聯領隊費格遜就即刻出口維護朗尼，話賓咸姆扮嘢，又話有人針對朗尼。老費咁講，明顯想足總放過朗尼。老費咁做係咪有用抑或弄巧反拙？今日就知。
巴西新星羅賓奴經理人日前證實，已經婉拒咗車路士及賓菲加嘅邀聘，其中車路士重係出價一千萬歐元（約一億六百萬港元）轉會費畀其球會山度士㖭。皇馬亦對佢有興趣，聽個經理人口風，連車路士都唔去，係因為決心加盟皇馬，睇吓可唔可以做到「新朗拿度」啦。
NBA嘅黃蜂隊原本已經俾傷兵搞到潰不成軍，點知噚日佢哋居然將正選韋士利交易到火箭，換嚟老將占積遜同尼治巴。唔通得勝率唔夠一成嘅黃蜂咁早放棄，博攞下年新人首選權？呢次交易對火箭就有利，因為平均攞十三分嘅韋士利肯定可以加強球隊後場威力啦！