喻可欣一向都鍾意用佢同劉德華嘅情史做話題，講咗二十年重未夠喉，佢重把心一橫寫埋書。呢排華仔做咗金馬影帝威盡台灣，喻可欣就順勢將佢親自撰寫嘅洋洋八萬字情書《情海星空──我與劉德華》嘅部份內容交畀台灣一本周刊轉載，真係識得揀時候做宣傳。
喻可欣喺書中將佢同華仔嘅相識經過、熱戀到分手嘅過程一一道出，重分成十一篇章，登埋當年佢同華仔嘅合照，廿年前嘅喻可欣確係清純又有氣質，大有林青霞嘅影子，同𠵱家成日騷胸嘅佢簡直判若兩人，唔怪得之華仔嗰時會咁愛佢，華仔喺兩人嘅照片後面，重以「最最最最最……愛妳的華仔」嘅署名，向喻可欣寫上「等到痴」、「想到迷」、「愛到狂」嘅字眼㖭。
不過喻可欣喺書中寫嘅嘢就十分大膽露骨，喺第九篇「十年之約」內，喻可欣就寫「擁抱得兩人都喘不過氣來，兩張熱吻的唇緊緊的糾纏着，舌尖感覺到鹹鹹的淚水」、「由上往下啃噬着他的臉頰……在到脖子……」，馮仁昭睇完都嚇一跳，俾佢嘅用詞嚇親。而華仔都知道喻可欣公開佢哋嘅陳年戀事，不過佢都係嗰句，冇回應！
趙薇今年真係唔知想點，日前佢至聲稱主動同資生堂解除廣告合約，諗唔到佢日前喺南京出席羽絨服宣傳活動時，竟然比原定時間遲咗個幾鐘至到場，但都贏得大班市民支持，不過佢出現咗五分鐘就臨鬆人，激到班等好耐擁躉猛咁鬧佢。
韓國變性藝人河利秀噚日以一身性感打扮，酥胸半露咁喺台灣宣傳首張唱片《狐狸女郎》，佢透過繙譯話：「我以韓文拼音來學唱國語歌，平均一天錄一首，都很輕鬆，我平常都會唱卡拉OK練歌。」河利秀又話自己用過衞生棉，減低着牛仔褲時皮膚嘅摩擦。
譚詠麟（阿倫）擔任Roadshow《紅人館》嘅嘉賓主持，噚日重請咗新人王苑芝同劉浩龍等做嘉賓。阿倫喺新城頒獎禮上撕爛勁爆男歌手嘅賽果，佢話係即興喎，係突然失控先會咁做，阿倫重勸各大單位唔好再亂咁請佢頒獎，因為連佢自己都唔知會亂做啲乜嘢！
梅雪詩（阿嗲）噚日喺尖沙嘴開記者會，佢話早前推出嘅限量版粵曲大碟《紅樓雪影夢成詩》，居然錄漏首歌就攞去賣，佢話：「隻碟印咗一千隻兩日就賣晒，但班戲迷打電話嚟話少咗首歌。」佢話應該做後期時出咗問題，𠵱家已補印一千隻同戲迷換番。阿嗲又話呢批碟每隻有唔同編碼，𠵱家會攞啲幸運號碼碟嚟拍賣，捐畀最近嘅印尼地震受害者。
雷有暉同鄧建明噚日接受商台訪問，雷有暉近日出碟，碟內有三首歌由佢親自創作，分別送畀太太、囝囝同朋友。雷有暉重搵咗老友鄧建明義務幫佢彈結他，但鄧建明就講笑話：「我邊敢收佢錢呀！佢知我咁多秘密，就當掩口費囉。」
