假後港股無恙，冇乜受到地震海嘯影響，恒指升2點，股民熱情未減，上升股隻比下跌股隻多兩成。藍籌中電盈（008）跑第一，呢個世界教人咪睇死某一隻股票。窩輪龍虎榜上，頭7件清一色係電盈C輪，當中4664升39%，成交金額最大，有60球，呢件係呢個框框耐唔中有推介嘅炒作對象。
滙控C輪4585：呢個框框最多推介嘅滙控C輪，係4441，數據一流。隻輪明年（就嚟變做今年）6月尾到期，輪價90仙，溢價0.3%（嘩，幾乎平水），槓桿率14.7倍。既然平水，咪理乜嘢有效槓桿率同引伸波幅，因為呢兩個數據肯定亦係好靚。
如果覺得4441有啲悶，想搏殺啲，則揀4585，明年5月初夠鐘，輪價55仙，溢價只係2.3%，槓桿率有24.1倍（有效14.7倍），引伸波幅15.0%，爆炸力好強。其他滙控C輪，有好幾隻爆炸力更勁，但交投唔掂，或者要畀多好多溢價，唔值得。
和黃C輪2291：和黃（013）3G前景，幾乎所有大行叫好，收71.50元，升0.75元，升勢未完。
炒和黃C輪，各有所好。有啲發行商叫買高溢價、高槓桿率嘅C輪，呢個框框則獨愛低溢價而槓桿率仍然唔錯嘅2291。
2291明年3月初到期，輪價98仙，溢價得0.4%，槓桿率7.3倍（有效6.7倍），引伸波幅24.9%。就算正股唔多對辦，揸隻輪都唔怕蝕溢價。
中企C輪2204：國指微升，中企C輪2204則由10.9仙跌到10.5仙，溢價縮剩1%，更加抵買。
章盛