偶遇一位澳洲姑娘，衣着甚為肉感，不敢正視之。朋友介紹話澳洲姑娘明年來港做工程師，現在仍然喺倫敦返緊工。左丁山心諗，如果佢着得咁少，落到地盤，地盤安全主任要打醒精神，免生意外。姑娘話嚟過香港幾次，最鍾意去赤柱市場（StanleyMarket），左丁山問佢赤柱有乜好，姑娘答曰：「從中環坐巴士去赤柱，道路彎彎曲曲，海灣美景盡入眼簾，好靚好吸引，你冇注意到咩？反而去到市場，就未必有好嘢賣。」
說來慚愧，十幾年未試過搭巴士入赤柱，外地遊客眼中之香港美景，左丁山真係冇注意到，更加唔知道外來遊客成日去赤柱究竟為乜。聽完澳洲姑娘咁講，搵日得閒，搭巴士入赤柱飲餐茶至得。
姑娘講到，來港做工希望有時間學識中文，因為佢喺倫敦碰到一位中醫，飲過涼茶，覺得甚為神奇，希望能夠學中醫，故此先要學中文。佢好奇怪佢喺澳洲認識唔少中國朋友，都係澳洲長大，冇一個識睇中文書、寫中文字，姑娘問：「我哋喺澳洲讀書，雖然學吓法文、西班牙文，但因為實習機會少，學完好易唔記得，結果只識英文一種語言，我去到倫敦返工，到歐洲旅行，先知道好蝕底。中文是否好難學？我啲Chinesefriends全部唔識睇中文嘅。」
身為唐人，左丁山就覺得學習中文，一啲都唔難，但華人家長移民後，多數驚仔女英文唔掂，自小學開始就猛咁催谷學英文，仔女大咗，一定會覺得中文字好難記，冇心機學習。各位年輕啲嘅家長，千祈要吸取教訓，自細就教仔女中英雙語，不可過份重英抑中，否則兒女長大成人，俾外國人取笑點解唔識中文之時，就責怪父母當年眼光短淺。