樓市熾熱，刺激「冬眠」業主，趁勢放售單位，屯門居屋兆軒苑一個空置七年嘅單位，放盤一個禮拜就賣出。
兆軒苑呢個Ａ座低層八室，四百九十六呎，業主見近排樓市好景，嘗試放售，結果由一個男護士，用五十萬承接，呎價約一千，屬於市價。
中記陳志輝話，業主喺九一年用約二十一萬買入單位。住咗一輪，後尾因搬出九龍同家人住，所以喺九七年首次放售單位，索價約百二萬。儘管缺乏承接，但業主唔急於賣樓，一直將單位丟空。今番第二度放售，竟然話咁快賣得出，計埋補地價，都執到十零萬。
兆軒苑平均每月只係得三五宗買賣，平均呎價九百五至千二，個別優質盤源，買家亦願意追價八個巴仙到一成之間。
攞咗售樓紙嘅西環泓都部署開售。雖然遇上聖誕節，同埋今個周末嘅除夕元旦假期，市場對呢個新盤仍然好重視，地產代理更加心急，急不及待提交準買家出價，畀發展商新世界做定價參考。
新世界發展營業及市務總監何伍燕榆話，由於多個準買家計劃大手洽購達一百伙，為免樓盤投資風氣過盛，將與市建局開會，研究會否將單位大手售予投資者。
所以，待雙方協議後，再公布付款辦法等細節，預料最快下個月至會有結果。
聽聞，低層單位接到出價五千至六千蚊，高層七八千。
今個月雖然四周圍都充滿節日氣氛，不過地產代理一啲都冇怠慢。
美記張錦成（圖三）話，今個月生意比舊年十二月多四成四，又打破九六年紀錄。
之所以咁好生意，張錦成話，多得月初新盤銷售成績好，薄扶林貝沙灣、火炭晉名峰及尖沙嘴君臨天下等，都賣得唔錯。
未到月尾，已有二十六間分行做過百萬，新盤熱賣嘅主區，好似大圍瑞峰、沙田九肚山與西半山分行，都榜上有名。
印尼地震引發大海嘯，造成重大傷亡，令人慘不忍睹，各方相繼伸出援手，今年大豐收嘅地產代理，自發搞籌款運動。
中原地產總行同八十家分行，設置籌款箱，收集員工及客戶善款，轉交「樂施會」，進行救援工作。
旗下利嘉閣地產，今日則內部募捐，籌集捐款。
同行香港置業，昨日發起員工賑災籌款，將籌得款項，透過國際救援組織，滙畀有需要地區。
美聯物業就成立「支援小組」同熱線電話，一旦有員工或其家屬受到影響，即刻加以協助。
面對呢場世紀大災難，蘭西都呼籲大家，加入賑災行動，捐畀邊啲慈善機構都冇所謂。
電郵地址：
