熱咗大半個冬天，終於都有番啲寒意，天文台重話呢幾日得番十幾度，係時候準備定禦寒用品。除咗暖氈暖爐呢類重型保暖用品外，一啲比較輕便的暖身、暖腳用品、暖水袋同埋可以隨身攜帶的發熱包，都可以幫你保持溫暖，陪你度過遲來的寒冬。
記者：梁彩燕 攝影：副刊攝影組
Model：Karine（StarAsia）
得意暖水袋造型搶鏡
喺屋企保暖，除暖爐外就首推暖水袋。只需裝入已煲好的熱水於耐熱特強的膠容器內，就可提供長時間的保溫功效。現時的暖水袋款式不斷創新，造型得意到忍唔住攬住佢。
意粉內膽好搞鬼
微笑花朵暖水袋，40cm直徑，花瓣由五種顏色組成，色彩繽紛。打開魔術貼開口，內膽係一個印咗成碟肉醬意粉的耐熱膠容器，夠晒搞鬼！
售價：$160(a)
16吋趣致跳跳虎
Q版的跳跳虎暖水袋，造型趣致，有成16吋高，大大個可以俾你攬到實。內膽能裝入1,000毫升熱水，保暖時間足，可以攬住暖笠笠睇電視。
原價：$109 特價：$86(e)
箭豬變暖水袋
箭豬今勻化身成卡通造型的暖水袋，收起晒身上的箭變成軟滑毛毛，33×20cm，細細隻攬喺身份外貼心溫暖，魔術貼開關口方便放入內膽。
售價：$148(a)
脹卜卜軟熟綿羊
呢個42×20cm的羊咩咩造型暖水袋，用柔軟毛巾質料做成，放入暖笠笠的內膽後，個肚脹卜卜、肥嘟嘟，外形盞鬼。
售價：$160(g)
拉鏈設計防內膽鬆落
月亮形暖水袋，有黃色同藍色兩面，又有小掛勾俾你抽起裝水，Size36×30cm，拉鏈設計，絕對唔使怕內膽會跌出辣親手腳。
售價：$198(a)
抽起小勾裝水免燙傷
又係AnimalPrint，20×33cm的Size最普遍，橡筋頭則用來防止內膽鬆脫。重有個小勾子方便你倒入熱水時免被燙傷。
售價：$138(a)
隨身攜帶
去到邊暖到邊
出街都想暖笠笠？帶個會自動發熱、保暖時間又夠持久的暖包就得。細細個放喺衫袋或褲袋最方便，有些產品更可以貼在衣服上，而發熱鞋墊就連冰冷腳板都照顧得到！
小暖蛋適合小童
呢個熱力可維持7至8個鐘的即熱暖手器，最適合小朋友。暖芯最高溫度達87℃，有埋個可愛BearBear熊的小暖蛋外殼，隔着暖包芯避免燙傷小手。
售價：$7.9(d)
暖雪人帶喺身
只有10cm高的小雪人，只要將透明啫喱內的小鐵面屈曲，就會為你放送溫暖。可惜沒有說明溫度及耐熱時間！
售價：$58(b)
除靜電唔怕黐住衣襪
白元迷你除靜電發熱包，最高溫度達67℃，平均亦有53℃，8小時可維持約40℃。放喺衣袋或褲袋就可感受溫暖，有埋除靜電功能添。
售價：$25.9(c)
釋負離子舒緩疲勞
以「竹燒炭」產生熱力，會釋放負離子，舒解疲勞。只要將暖貼貼於衣服外，就會散發約40℃的熱能。
售價：$50(h)
迷你衣貼平均50℃
白元負離子發熱衣貼，平均溫度有50℃，使用後可維持約40℃達10小時之久，Size的骰又夠暖。
售價：$35.9(c)
保暖襪貼
一包有5對的保暖襪貼，一塊分成上下兩部份，可同時讓腳面及腳底得到溫暖，更可持續3小時達36℃。
售價：$50(c)
熱鞋墊促血液循環
呢款熱力鞋墊1包3對，只要當普通鞋墊使用，拆開後放入鞋內便會自動散發熱能，重有抗菌作用。
售價：$30(h)
腳趾特別保暖
把鞋墊拆出後會產生熱力，為腳趾提供保暖作用，溫度有38℃，重可以保暖達5小時。
原價：$29.9 特價：$23.9(c)
家居暖品種類多不勝數
市面上的保暖產品愈來愈多，喺屋企使用的，除插濕電外，將暖包放入微波爐叮熱亦十分普遍。有專門暖肩及暖腰的產品，又有腳套、發熱暖餅，重有使用乾電池的背心等，實在多不勝數。
發熱背心最靈活
VolcamcHeat發熱背心，以先進物料製造，質料軟熟富彈性，傳熱速度快。每邊袋位只需插入3粒2A電池便可使用，方便靈活，分別有大中小尺碼。
原價：$999 特價：$798(g)
毛毛腳套軟熟夠暖
BeurerTW20發熱腳套，27×30cm，有2段溫度調校，腳套的圍邊和內部均是軟熟纖維毛，插掣後15分鐘便會開始感覺到暖意。
原價：$400 特價：$380(f)
發熱墊10分鐘變暖
BeurerTM20發熱墊，50W用電量，有兩個溫度以供選擇。體積為30×40cm，全身任何部位都適用。棉質墊套可除出清洗，暖墊約10分鐘便會熱，輸暖快捷。
原價：$283 特價：$255(f)
暖餅暖足3小時
意大利Ardes暖餅，只要約4分鐘的充電時間，待充電指示燈熄滅便可取出。足夠保暖達3小時之久，另有防熱棉套包裹暖餅以防燙傷，絕對是最慳電抵用之選。
原價：$320 特價：$304(f)
肩頸暖袋經濟環保
白元微波爐加熱暖袋，專門給頸肩部位使用。暖袋的形狀設計，用於頸及肩膀部位Fit到漏，放入微波爐叮熱2分半鐘就可保暖30分鐘，另附暖袋套，方便清洗又可重複使用。
售價：$99.9(c)
安全暖袋送公仔套
白元PP公仔微波爐加熱暖袋，只要把啫喱軟墊加熱2分鐘，保暖時間便可長達約2小時。附有雙重安全保險袋設計，重送埋可愛PP公仔暖袋套。
售價：$125(c)
售賣點：
(a)銅鑼灣city'super 25062888 銅鑼灣時代廣場B1地庫
(b)尖沙嘴city'super 23758222 尖沙嘴海港城3樓3001號舖
(c)黃埔吉之島 26276688 黃埔花園第五及六期地面及地庫一層
(d)康怡吉之島 28846888 鰂魚涌康山道2號康怡廣場南
(e)Trendyland 27449633 長沙灣廣場第2期5樓
(f)WingonPlus 27106288 彌敦道345號永安九龍中心
(g)西田百貨 26941111 沙田新城市廣場3期2樓
(h)千島葯坊 28314816 銅鑼灣崇光百貨B2地庫