701收料站：賭業股續領風騷

一年將盡，港股重有2個半交易日，小初諗住輪到芬佬出手搞櫥窗粉飾，點知放完假返嚟，依然係澳門賭業股獨領風騷，尤其係大廚主理的大華國際（600），淨係配股集資話會進軍濠江，股價已經炒到飛起。
大華噚日最高見過0.89元，收0.75元，升25％，成交一如其他濠賭股咁勁，高達1.8億元。
經紀陳話，據聞有證券界人士了解過，大華今次唔係吹水，真係搵咗間濠江酒店做目標，現時正傾緊收購，而且間酒店已經起好咗，一旦成事，可以即時有利潤入帳咁講。

新世紀績優派息佳
另外，大股東與濠江有淵源的新世紀集團（234），噚日公布截至今年9月止中期業績，盈利2501.3萬元，比去年同期上升271.17%，相當不俗，兼夾有中期息1.2仙派發，股價即時上升9.38％，收1.05元，成交金額827.8萬元。
早前新世紀公布向大股東增持兩艘郵輪權益時，股價已經起飛，當時曾有傳聞，新世紀或會搞配股都未定。
慕容小初