在倫敦逗留了頭尾八天，除了一連八個早上吃同樣的英式早餐外，其餘十六餐盡量找不同國家的東西吃，冇咁悶。英式早餐，除了煙肉火腿腸仔蛋之外，一定會有的是菌類食物，我是個菇狂，每朝狂𡁻大小菇一大碟，間中加一兜牛奶麥皮及鮮果乳酪，重有必然膽拖嘅茄汁焗豆，食完飽到上心口，精力充沛，行極唔攰。
在OxfordStreet附近有一整條橫街開了十間八間貝魯特餐廳，揀了最多人幫襯的一間，唔係雞就係羊，薄餅做得很好，可以一試。嚟到英國少不免食FishnChips，唔係太過特別好味，其實乜嘢用油炸過後再加茄汁都係咁上下味，叫做食過。啤酒煮青口亦是當地名菜，一大煲青口當瓜子咁剝，循例一吃，都算可以。
飯癮大作，於是在唐人街附近找到了一些由韓國人開的韓國食店、日本人開的日本食店及泰國人開的泰國食店，居然全部風味不俗，尤其在韓國食店內更食到一啲在香港未食過的泡菜，意外收穫。
Soho區有許多小餐廳，其中一間西班牙餐廳絕好生意，人龍係咁打蛇餅，等了兩個鐘頭才吃到那碟西班牙海鮮飯，好好食兼抵食，侍應係西班牙美女，排兩個鐘頭隊算有回報。印度菜普遍得很，隨便找間多人幫襯的便冇走雞，比香港吃到的好吃。中國菜最差強人意，除了在Bayswater上的「喜相逢」的龍蝦麵之外，其餘普遍水準以下，重要貴到抽筋，在唐人街百幾蚊港幣食碟叉雞飯，死未?!加埋在NottingHill吃到的德國雞髀包，八天內吃了九個地方的菜式，十足八國聯軍打中國，算對得住肚皮。