印尼日前發生大地震引發海嘯造成多個國家死傷慘重，各地死亡人數以驚人數字遞增，過百萬人無家可歸，很多兒童失去父母。本報創辦的「蘋果日報慈善基金」昨日率先捐出二百萬港元，成立「亞洲地震及海嘯救災基金」，由今日起至下月十五日，收集各界善款賑災，昨日不少明星名人紛紛響應，周潤發、劉德華、周星馳及黎明帶頭各捐二十萬元，加上陳慧琳、梁詠琪、古天樂、楊千嬅及鄭明明等，合共捐出一百○九萬元善款予該基金，並呼籲各界人士踴躍捐款。 採訪：陳月媚、朱倬誼、蔡丹
周星馳--義不容辭
捐20萬
呢次印尼發生大地震所引發嘅海嘯，的確造成好大傷亡，亦令到當地唔少家庭因而破碎，我睇電視新聞時都覺得慘不忍睹。其實我平日都有為香港嘅小朋友出吓力做善事，所以今次《蘋果》成立咗個救災基金，我當然係義不容辭作出捐輸，同時都希望其他市民亦可以伸出援手。
劉德華--滴水成河
捐20萬
雖然呢個慘劇唔係發生喺香港，不過都係發生喺我哋生活嘅地球上，呢個時候唔應該再分種族國界，好多唔同國籍嘅前線醫護人員都飛咗去幫手，我出唔到乜嘢力，惟有盡一點力去捐錢，希望幫災民重建家園。香港係一個最有善心嘅社會，捐得一蚊就捐一蚊，滴水可以成河，請大家有錢出錢，有力出力。
周潤發--珍惜所有
捐20萬
我睇新聞見到受海嘯影響嘅東南亞災民真係好慘，死咗咁多人，呢啲國家肯定元氣大傷，所以我捐出二十萬，希望盡點綿力，幫助有需要災民。天災人禍其實真係好難預測，所以大家應該好好珍惜每一日，要好好愛護眼前人，亦希望生於福地嘅香港人，如果能力許可，不妨有錢出錢，有力出力。
黎明--出心出力
捐20萬
今次大海嘯令到無數人痛失家園，我作為聯合國兒童基金會嘅大使，好清楚聯合國已經向災區展開救援工作，派發藥物同物資，而我平日都為聯合國兒童基金會出力，今次亦盡一點心意，捐出二十萬畀《蘋果》嘅基金。唔理係乜嘢渠道都好，希望香港市民都會出心出力，捐款幫助災民。
陳慧琳--環保救地球
捐10萬
過去一年有好多事發生，希望出年可以再冇天災人禍，我一向好喜歡幫助有需要人士，所以今次東南亞各地發生嘅悲劇，我會捐出十萬幫助災民，其實要減少天災人禍，環保都好緊要。
梁詠琪--心繫兒童
捐5萬
我知道香港有啲慈善機構都籌咗好多錢去幫啲災民，香港人好熱心，亦好關心災情，我好心痛受災難影響嘅小朋友，知道呢啲消息後，自己心情都比較差，所以我嘅新年願望，係希望世界少啲災難，人人身體健康，同未搵到親人嘅災民可以快啲搵番佢哋啲親人。
楊千嬅--伸出援手
捐5萬
今次咁大嘅災害，對好多東南亞國家造成好大破壞，喺呢個時候，呢啲國家肯定需要其他國家伸出援手，咁香港人一向樂善好施，所以我希望有能力嘅市民，可以有錢出錢，有力出力。
古天樂--見者心酸
捐5萬
見到電視新聞有好多家庭去東南亞旅行，點知遇到海嘯，搞到家破人亡，五個人去，變咗一個人走，睇到呢啲情景我覺得好心噏，所以我都希望可以捐錢幫吓有需要人士。
鄭明明--關心同鄉
捐1萬
我係印尼華僑，我阿哥一家人定居耶加達，我知有大災難時第一時間打畀佢，好彩佢住嗰度冇受波及，平安無事。天災嘅嘢真係冇得避，希望大家可以團結一心，有錢出錢。
（另陳小寶陳細潔姊妹捐二萬元及「玩具大王」蔡志明千金蔡加敏捐一萬元。）
