樂隊Beyond的演唱會下月舉行，黃家強表示有意邀請阻止領匯上巿的盧婆婆到場欣賞，還打趣謂會送金牙籤給她。而黃貫中則表示容許盧婆婆上台打鼓發洩，但不准把世榮的鼓棍當牙籤。
樂隊Beyond將於下月二十七日在紅館舉行六場演唱會，主辦單位表示這是Beyond的最後一次演唱會。Beyond成員葉世榮認為巿民看他們的演唱會能釋放怨氣，黃家強聞言即謂想邀請阻止領匯上市的盧婆婆到場欣賞，還會打定一支金牙籤送給盧婆婆做禮物。
世榮指香港人積累了太多怨氣而無處發洩，他說：「有怨氣唔緊要，最緊要懂得釋放，睇Beyond演唱會係一個好好嘅發洩方法，入場睇騷就知。」家強聞言即嚷着要邀請盧婆婆前來捧場，他說：「盧婆婆可以令領匯上唔到巿，有咁大威力，點可以唔請佢嚟，我重要打定支金牙籤畀佢，但會叫佢千祈唔可以亂敲人嘅老虎頭，因為我哋嘅保安好嚴，唔守秩序會俾人拉出場。」
黃貫中（阿Paul）更提議讓盧婆婆上台發洩一番，他說：「佢可以上台發洩，叫世榮畀佢打鼓，我敢寫包單，佢狂打五分鐘，怨氣自然會冇晒，但就一定唔可以將世榮嘅鼓棍當牙籤。」
此外，雖然今次演唱會之後，Beyond不知何時再同台演出，但他們謂這是另一個新階段開始，故此在演唱會上會細述他們的組隊歷史。
阿Paul說：「我哋呢排查番紀錄先知Beyond咁多年嚟出過幾十張唱片，之前有啲唔入流冇計，以前我演出都係用七成功力，但呢次我應承會用十成功力，彈爆個結他。」
