話說在NottingHill碰上有線攝製隊，劈頭第一句就問我嚟英國做乜？其實今次旅行真係冇特定原因，混沌一片的腦海突然閃過一個答案：「嚟睇波，冇錯嚟睇波！」
係噃，一場嚟到英國冇理由唔睇番場波，連忙上網買波飛，阿仙奴、車路士、富咸與熱刺都係倫敦球會，首選當然係阿仙奴，可惜撞啱嗰個禮拜冇主場踢。次選車路士，但全場門票經已賣晒，友人說惟有到現場炒黃牛，但恐怕要付出超過一百五十英鎊一張飛，除非願意在球賽開始後再跟黃牛黨討價還價，有望在一百英鎊左右成交。熱刺主場的門票尚餘少許，上佳位置售價六十英鎊，一於咁話，先睇熱刺，再睇車路士。
喺英國做球員真係威，球員的車隊沿途由警方開路，車隊經過的地方，球迷夾道拍手歡呼，威過威士忌加水，威水！入場保安嚴密，先經過一道極窄的閘，莫講話帶武器，我一身的肥肉也差點擠不入，塑膠水瓶一律准帶樽唔准帶蓋，守門員說沒有瓶蓋就算掟中人都冇殺傷力，也有道理。球場內外售賣的熱狗難食到極點，咬了兩口便放棄。
曾在法國、西班牙及意大利看過球賽，各地的球迷大不同，法國的球迷最喜歡攤大對手仰天長歎；西班牙球迷則係咪都𠵱起棚牙，球賽是借口，開party才是正主兒；意大利球迷最肉緊，成日兩手揸成鶴嘴狀，係咁錫指尖，然後再雙手合十拜個球證；英國球迷最爛口，F嚟F去，F到耳到側埋；不過氣氛確係一流，冇幾耐，大家一齊F，變成自己人，F個不亦樂乎。