權威美國娛樂雜誌《EntertainmentWeekly》每年都會選出一啲風雲人物，今年都唔例外，合共有十二位當時得令嘅娛樂圈紅人入圍，其中內地女星章子怡重十分威風，雖然佢只係排第十二位，但就係唯一一位入選風雲人物榜嘅華裔女星，都咪話唔巴閉。
《EntertainmentWeekly》嘅編輯話章子怡不但係一位演員，重係一位武術藝術家，可見佢主演嘅多部武俠片包括《英雄》同《十面埋伏》係幾咁深受美國觀眾歡迎，《十面埋伏》又入圍金球獎最佳外語片，重有機會問鼎明年奧斯卡，風頭可謂一時無兩。雜誌編輯睇好章子怡擔演女主角嘅荷李活大製作《藝伎回憶錄》，視為明年其中一部最令人期待嘅電影。
至於其餘有份入圍嘅人物，重有執導電影《受難曲》嘅米路吉遜（MelGibson）、爭議性紀錄片《華氏9/11》嘅導演米高摩亞（MichaelMoore）、《無痛失戀》兩位男、女主角占基利（JimCarrey）同琦溫絲莉（KateWinslet）等。
趙薇喺舊年十二月成為化妝品公司資生堂代言人之一，但噚日有內地報道話趙薇已經被另一內地女星水靈搶飯碗，趙薇經理人陳蓉為免除無謂嘅揣測，即刻澄清，話因為廣告商牽連嘅產品太多，搞到趙薇連洗頭水、沐浴露同護膚品嘅廣告都唔接得，所以至主動解約喎。
劉浩龍入行多年，前晚終於開齋，喺頒獎禮攞到好成績，佢噚日去商台接受訪問時，心情都特別興奮，佢話連瞓覺都要攬住個獎，最終俾個獎拮親。至於提到佢嘅緋聞女友何韻詩裝扮得美豔出席頒獎禮，佢好大方咁讚對方，劉浩龍話：「真係要讚佢，𠵱家正呀，女性特點出晒嚟，goodfit！」
薛家燕每年年尾都賺唔少外快，但係今年佢就決定放低晒啲工作，陪囝囝囡囡一家團聚，食聖誕大餐，家燕姐噚日就話：「我喺屋企都鬼死咁忙，不停咁拆禮物，有啲重係生日禮物，其中有啲重係現金支票，睇番日期重已經過晒期，真係嘥料！」
徐子珊噚日到將軍澳電視廣播城古裝街拍華裔小姐嘅宣傳片，着住吊帶短裙嘅徐子珊路經古裝街時有工作人員問：「短裙喎！𠵱家啲女記者咁性感嘅？」旁邊嘅人就話呢個係港姐冠軍徐子珊。徐子珊知道之後，有少少愕然話：「咁搞笑？唔認得我唔緊要，佢讚我靚咪得囉！」
