「新城勁爆頒獎禮」前晚結束後，竟掀起一場新城、港台罵戰，新城娛樂台台長朱明銳在慶功宴上怒轟港台提議搞四台聯頒多餘及浪費納稅人金錢，考慮明年退出不參與，又大爆港台為舉行除夕夜的「十優歌手選舉」，壟斷歌手檔期，行為霸道。港台高層周國豐昨還擊指新城嘈喧巴閉、潑婦罵街。
每年一度的「新城勁爆頒獎禮」前晚圓滿結束，會後眾得獎歌手即往灣仔出席慶功宴，新城娛樂台台長朱明銳在慶功宴上突然炮轟港台霸道及浪費納稅人金錢舉行頒獎禮，又指由港台提議的四台聯頒大獎多餘，新城更表態擬於明年退出聯頒行列。
對於四台聯頒大獎，朱明銳炮轟道：「四台聯頒好多餘！我哋一直唔贊成、唔認同，用納稅人嘅錢搞頒獎禮，佢哋閉門計自己數，唔應該繼續支持四台聯頒，唔應該支持港台搞表面化嘢嚟粉飾樂壇團結，我哋會同港台建議明年唔參與。」
朱明銳又大爆港台為除夕晚舉行「十優歌手選舉」，竟壟斷歌手檔期，他說：「港台搞十優mark晒歌手啲檔期，連新人都mark埋，其他台冇得搵歌手做嘢，求佢哋周國豐大哥、唐哥（港台高層李再唐），我哋喺除夕澳門有個騷，叫佢放啲嘉賓出嚟，打咗五次電話都冇回應，最終畀咗個安仔（許志安）同Joey（容祖兒）嚟。」
朱明銳續說：「港台好霸道！商台搵乜人countdown（倒數）呀？咪夏韶聲囉！啲唱片公司都話港台嗰晚mark晒期，唱片公司重講係咪想我哋冇獎攞呀？港台夠薑、夠勇氣，就搞個全民直選吖笨！不如叫六百萬人投票呀！」不過，提到「勁爆」頒獎過多一事，朱明銳說：「起碼個個歌手多謝我，冇人唔開心。」
對朱明銳指港台霸佔歌手除夕檔期霸道一事，港台製作統籌周國豐說：「係得新城打過嚟之嘛，歌手嗰晚去邊係睇佢哋意願，好多人都試過唔嚟十優有獎，Joey上年去商台countdown都有十優，係咪朱明銳先生要同客戶交代至有咁嘅疑問呀？商台同無綫都冇問題，冇講過，淨係新城嘈喧巴閉，好似潑婦罵街。」
無綫外事部助理總監曾醒明昨亦在電話中說：「四台聯頒搞咗咁多年，要等今年所有頒獎禮結束之後，再坐低傾吓，有冇存在價值。」
採訪：王連連、胡比
攝影：仇志德、葉君海
