個多星期前，元斌在旺角Missha專門店掀起簽名風暴，香港Fans迫爆西洋菜街，這罕有由男星做代言人的韓國化妝品牌除明星效應外，本身吸引力亦唔細，平靚正乃品牌路線，Cutie花花包裝亦食正𡃁妹口味！不過講抵買，始終都係韓國本土Missha，化妝品價錢比香港更低，兼有大把禮物包括大量元斌簽名海報送，總之就着數多多，去到漢城點都一定要幫襯！
記者：張銘恩 攝影：陳陶鈞
鳴謝：韓國觀光公社
梗有一間喺左近
Missha成立於2000年，不但起用男星做品牌代言人，其背後始創者徐詠筆本身也是大男人一個，他本着「化妝品是日用品」的宗旨，認為定價一定要合理，由幾蚊至百幾蚊的產品，質素一樣不俗，所以深得韓國人民歡心，短短4年間Missha在韓國已經其門如市，單在漢城明洞已經有4間分店，更已成功打入澳洲。走在漢城，遇上Missha的機會就如我們在香港遇上7-11一樣──梗有一間喺左近！
買嘢勁多禮物送
韓國乃Missha大本營，他們沒有大灑金錢造宣傳，反而把省下來的宣傳成本製造不同的禮物去吸引顧客，這些禮物造型Cutie又實用，深得韓妹歡迎，而且個個月都有新嘢送，夠晒新鮮感，所以唔只成功吸引到韓妹幫襯，連明星都鼎力撐場。
花花毛氈
購物滿約$210，即送印花毛氈，攤開只得約2.5×4呎，瞓覺當被冚就差啲，坐車時放上大髀保暖就啱啱好。
搶眼化妝鏡
立體Missha花花Icon座枱鏡，購物滿約$140即送，又Sharp又搶，最啱做部屋擺設，背後有埋花柄，好精緻！
夾睫毛器
小巧夾睫毛器，女仔化妝袋必備，購物滿約$70就有得送，細細個隨身攜帶好方便。
人人有份皆大歡喜
只幫襯一支幾蚊雞指甲油？OK！一樣有嘢送，元斌簽名海報唔夠？再送多張花花貼紙畀你，最緊要大家高興！
產品推介
唔使多講，韓國Missha的貨品當然比香港分店齊全，而且貨源充足，據筆者觀察所得，韓國Missha店唔少貨都比香港平3成左右，去開韓國有心掃貨，唔該帶定多啲彈藥。
男用護膚品
韓國獨賣元斌面膜
男性專用面膜，一盒5塊，其實這個系列香港也有，可惜並非用元斌做Packing，感覺差好遠！約$55。
漢方營養品
美思系列乃Missha自家開發的漢方護膚品，分有男女配方，男士爽膚水及乳液各約$70。
女用護膚品
玫瑰香薰系列
甚受韓妹歡迎的最新RoseWater系列，專為缺水及失去彈性的皮膚提供營養，價錢近乎香港的6折，爽膚水、平衡乳液、精華素及啫喱霜一律約$39。
中草藥面霜
由中草藥提煉而成的美思濃縮面霜，具平衡皮膚色素功效，增加皮膚光澤，約$72。
大熱乳酪面膜
包裝搞鬼的乳酪面膜，清香水果成份能舒緩皮膚及補充水份，港韓兩地均大熱，約$24。
牛奶身體乳液
香噴噴牛奶味身體乳液，有春草、棉花白及迷人粉紅3種選擇，冬天乾燥皮膚勁易爆坼，沖完涼最啱用，約$28。
送禮熱選貨
人手製香梘
全天然用料及人手製造的香梘，有菠蘿、西瓜等水果味（約$11），還有薰衣草、茉莉等花香味（約$18）選擇，個Packing咁靚，送畀女仔最啱。
香蕉味乳液
用咗成個人散發淡淡香蕉味，非常過癮，沐浴露約$37，身體乳液約$40。
果味唇彩
各款水果味的唇彩，基本上係女仔都啱用，實唔會買錯，約$30。
多色眼影
質感OK，不過最正都係個花花盒，夠晒可愛，收到應該會好開心，約$18。
Missha（★）
地址：漢城中區鐘武路一街24-81
電話：（82）2-2124-2201
交通：乘地鐵2號線於明洞站落車，出四號出口，步行5分鐘即到。
註：以上價錢為貨幣兌換約數，$1兌136韓圜。
