領匯上市失敗，證券經紀好似患上金融憂鬱症，要上街示威，嗌番幾句，宣洩吓啲不滿。諗落呢個主意都唔錯，做人唔可以常把心事埋藏在中心，久唔久爆發一次，盡吐心中情，先至唔會產生精神病。好似左丁山咁，日日寫稿咁辛苦，食飯都望住個鐘，驚住「死線」已過，累親編輯。此外更要俾唔同嘅米飯班主「哦」，你話冇壓力就假嘅，故此每星期到馬場，猛嗌「頂住頂住」或者「七號、七號、七號……」賓架P為人斯文有禮，貴為遴選會員（votingmember），有一次坐在左丁山張枱，低聲對左丁山講：「咁大聲，驚失禮喎，細聲啲。」唉吔，人都癲。
上星期三夜馬，第六場跑「警察盃」，一哥李明逵夫婦到場頒獎，大熱門係羅焯先生（大富豪老闆）嘅「新里程」，獨贏熱到一點七倍，買唔落手，轉買吳嵩隻五號「富有心得」，用「富有心得」、「新里程」雙膽拖幾隻冷門，包括上海總會會長李和聲先生嘅公子李德麟名下嘅「大唐勇士」，去到最後三十米，「大唐勇士」領先，「富有心得」力追，左丁山大嗌「五號五號五號」，唉，竟然輸個馬鼻，追唔到。
隻「新里程」呢？蔡神仙都冇救，跑咗去邊呀？「大唐勇士」爆出四十六倍大冷門，左丁山失諸交臂，中唔到條四萬五千蚊嘅三重彩，暈咗一陣。點知後面有位老友贈我一句：「李一哥嚟頒獎喎，李和聲李德麟父子係大唐證券老闆，係行尊嚟㗎，你話一太頒獎畀大富豪，會唔會有啲意意思思呢？」左丁山為之氣頂，買馬都要考慮埋呢啲因素，腦袋豈非會爆炸？
冇所謂嘞，嗌咗幾場，舒服晒，亦輸到服，返屋企大覺瞓，瞓醒冇晒憂鬱、壓力，又試打拼過。