東南亞無端端地震，令今個聖誕蒙上陰影，同時亦令小初覺得，今日唔知明日事，如果炒股票有錢賺，不妨趁早食胡，然後及時行樂。
聖誕假期結束，今日港股復市，究竟有咩嘢好買呢？經紀黃話，可以考慮國美電器（493），雖然大股東3個月內兩度減持，第二次配股價又高出第一次唔少，但聽講芬佬不但未有沽貨獲利，而且一再加碼，原因係睇好國美未來盈利前景。
大陸家用電器消費繼續強勁，國美其中一個優勢就係size夠大，有能力同供應商議價，保持毛利率。
國美大股東喺今個月中，以每股6.25元，減持2.2億股，套現十幾億銀，但批完股之後，國美股價硬淨，假期前國美企穩6.85元，但成交就比較稀疏，只得26萬大股，金額177.6萬元。單睇呢一點，就知道批貨由芬佬接晒，唔係落在一般短線散戶手中。
經紀黃話，家陣臨近年結，國美可能重有櫥窗粉飾效應。
慕容小初