力爭劇場新寵
Rock聲魅影火併高音富家子

本周四上映嘅《歌聲魅影》，除咗布景服裝華麗之外，幾位粉墨登場嘅主要演員好似艾美羅森（EmmyRossum）、謝拉畢拿（GerardButler）同柏德烈韋遜（PatrickWilson）都係唱得之人，扮演「魅影」嘅謝拉畢拿重以Rock友唱腔同高音了得嘅情敵柏德烈韋遜爭女。

原創人大讚
現年十八歲、喺片中飾演劇場新晉紅伶嘅艾美羅森自七歲起就喺紐約大都會歌劇院受訓，歌喉當然有番咁上下，而扮演「魅影」嘅謝拉畢拿同飾演靚仔富家子嘅柏德烈韋遜，佢哋嘅歌藝亦都令導演同音樂原創人安祖萊韋伯（AndrewLlyodWebber）非常滿意。主演過《盜墓者羅拉：生命之匙》嘅畢拿有唱BandSound經驗，除咗外表符合導演要求嘅「粗獷、俊朗、帶點殺氣」之外，韋伯重大讚話：「畢拿擁有出色嘅搖滾味高音聲線。」
而演出過《Oklahama！》同《TheFullMonty》等歌劇嘅百老匯紅星韋遜，今次以出眾嘅男高音歌聲同「魅影」爭奪女主角嘅芳心。至於美妮哉花演嘅歌劇紅伶一直係「魅影」嘅心魔，美妮形容呢個角色係「一八七○年代嘅碧咸、麥當娜同KylieMinogue嘅混合體」。

二億建劇院
此外，喺拉斯維加斯梵蒂岡賭場酒店內將興建一個永久音樂劇舞台，專門上演《歌》片全新九十分鐘版本。呢個耗資近二億港元嘅劇院複製巴黎歌劇院嘅建築，重配備全新特技效果，將會喺○六年春天揭幕，勢成音樂劇界創舉。