第三屆特首大熱之一嘅唐英年，在胡錦濤訪澳與曾蔭權特別寒暄四句之後，行情急轉直下；尤其係佢老友田北俊心急到好似隻蟻咁，大鬧煲呔曾隻手遮天，用西九嚟討好李郭兩家爭取本錢，充份反映自由黨嘅失落，以及跑馬仔大賽已進入直路。
其實做共產黨馬仔真唔容易。即如去年區議會選舉失利之時，民建聯港進聯同工聯會嘅壓力都好大；又如七一遊行，中聯辦亦孭晒鑊，若然佢哋喺大陸，好多人都返咗鄉下耕田，唔使等到𠵱家始「免職」。
講番唐唐，佢本來憑藉父蔭（大家記唔記得朱鎔基接見佢時話同佢爸爸好熟？）一早埋咗上海幫堆，咪坐定粒六為黨及人民服務。點知江澤民咁快下台，人一走茶就涼，連江握手嘅董建華都要查找不足，咁唐唐同胡主席「冇偈傾」又有乜出奇呢？在中國宮廷劇中，呢類站隊風險，早應計算到，田少使乜咁躁呢。
其他有份跑嘅馬仔，近來都表面低調但暗箭橫飛。好似梁振英，佢隻馬無端被人射低之外，更四圍有風話佢同領匯事件有關，因為佢係證監呢個小組嘅成員喎，真係幾好笑，八方聽講佢唔係開咗幾多次會啫。至於吳光正老闆，最近有啲小動作，同領導人南下有冇關就未知，但潮流唔講商人治港，佢就識做地低姿態。
（圖）唐英年由之前行情高漲到𠵱家俾人睇淡，真係世事難料。
傳真︰2623-9278
電郵︰