呢期中國球員好興出外試腳或者加盟海外球隊，而中國國腳中場申思亦都喺前日出發去西班牙嘅馬略卡。不過，佢並唔係去試腳，而係參加「世界自由球之王」大賽。
記唔記得我求大俠之前同大家講過，喺今年十二月二十九及三十日，西班牙馬略卡會上演「世界自由球之王」大賽，大會由世界各地選出三十名主射自由球最醒嘅球員，同埋六名當今世上最好門將，喺二十九同三十日大鬥法，而申思有幸代表中國參賽。如申思喺二十九日嘅預賽脫穎而出，晉身最後六強，就可以喺三十日同直接晉身決賽嘅四大自由球高手施丹、碧咸、卡路士同埋朗拿甸奴較量！
對於今次比賽，申思好認真，人人放假時，佢重埋頭苦練，當被問到有冇信心勝出，佢就好謙咁話：「其實我都係臨急抱佛腳，近日狂練想攞番射波嘅感覺，希望到時有好表現啦！」
美國影星積尼高遜噚日「一反常態」，冇喺聖誕節扶老攜幼帶晒成家人去洛杉磯捧湖人迎戰東岸一哥熱火場波，呢場重啱啱係拜恩同奧尼爾呢對昔日湖人戰友首次碰頭㖭，唔通阿積覺得掌心又係肉，手背又係肉，都唔知幫邊個好，倒不如滑雪度假去也，費事眼冤？
最近同皇馬因續約問題意見不合而扭計嘅卡路士，趁呢個聖誕假期返咗去巴西老家散心，投入全副精神喺「副業」上面。呢個「副業」就係玩賽車，佢最近已買咗架戰車，準備將來參與一級方程式，重同「車神」舒密加好老友㖭。估唔到佢踢法上有速度之外，連嗜好都係飛車！
前阿根廷中場球星列當度，因久傷難癒被迫退役後，考緊教練牌準備教波；但有報道指列當度上周喺西班牙一個足球節目做嘉賓，批評皇馬現有中場線嘅優缺點後，好評如潮，搞到佢自己都心郁郁想轉做講波佬。我求大俠覺得既然有天份，就唔好嘥，起碼冇教波咁大壓力先啦。
德甲班霸拜仁慕尼黑有鑑於唔少人喺互聯網上非法拍賣拜仁嘅物品同紀念品，令球會損失唔少，於是決定肥水不流別人田，喺拜仁官方網到搞拍賣，結果反應甚好；好似中場波勒喺德國盃着過嘅波衫，就賣到一千三百歐元，沙里咸美錫喺歐冠盃嘅球衣，更賣得一萬五千歐元㖭！