萬人迷碧咸（DavidBeckham）同妻子Victoria，上星期四請咗一百二十位親友到其赫爾福特郡大宅，見證佢五歲兒子布魯克林（Brooklyn）同兩歲兒子羅密歐（Romeo）嘅領洗儀式。當日碧咸原來好激動，喺班親友面前含淚咁表示今年同Victoria度過好艱苦嘅一年，重發誓唔會再背叛老婆。
據昨日出版嘅《世界新聞報》報道，上星期唔少人見證碧咸喺兩個仔嘅領洗儀式上，含淚同震晒口咁對老婆Victoria發表愛的宣言：「我同Victoria面對一個好艱辛嘅年頭，但我哋已經共同度過咗，我發誓會令我太太永遠快樂。」碧咸繼續話：「我只想講我好愛我太太同兩個仔，冇咗佢哋，我都唔知點算。今日係Victoria同我好特別嘅日子，兩個仔亦係我哋嘅一切。」唔少人都話碧咸呢番話，其實係表示佢以後唔會再背住老婆出去沙沙滾。
而嗰日嘅領洗儀式，則搞到一鑊泡。好似好怕水嘅羅密歐喺領洗嗰陣周身郁，最後搞到成身濕晒。而身為賓客嘅前SpiceGirls成員GeriHalliwell同MelC又忍唔住鬧大交，碧咸同Victoria兩家人影合照時又面左左，食飯又要分開坐，而伊莉莎伯凱莉（ElizabethHurley）着得暴露之餘，又係咁飲免費酒，激到爆嘅Victoria專登望都唔望佢一眼。