印尼昨日發生大地震觸發海嘯，波及鄰近的泰國等地，死傷無數，港台DJ車淑梅一家四口昨由香港飛往布吉島途中，亦因當地機場封閉而被迫轉飛曼谷。車淑梅昨表示本打算入住的布吉酒店已被海水浸至二樓，若非平安夜當日要與黎明一起做節目而押後行程，相信他們一家亦難逃一劫。
印尼昨日發生大地震，觸發印尼、斯里蘭卡、印度、馬來西亞和泰國發生海嘯，死傷及失蹤者無數，其中泰國布吉島更有多人被巨浪捲走，生死未卜。適逢聖誕假期，香港電台DJ車淑梅昨早與夫婿張文新及一對子女由香港飛往布吉島度假，但飛至中途布吉島機場臨時封閉而轉飛曼谷。
預訂酒店水浸至二樓
身在曼谷的車淑梅昨接受長途電話訪問時說：「我哋一家四口搭今朝十一點嘅機去布吉島，同機嘅重有旅遊協會前總幹事陳鄭綺艷，點知下晝一點幾，機師話布吉島發生特別事故，機場封咗，惟有轉飛曼谷。我聽到之後成個人呆咗，其實今日出門口嗰陣，我都聽到印尼地震消息，但唔知道連布吉都受影響，而且，如果我哋起飛之後先至封咗機場就話可以原諒，但如果航空公司一早知道，點解重畀我哋上機？稍後我都要打電話了解一吓。」
問到機上乘客反應如何時，車淑梅說：「班機全部爆滿，大家都好無奈，我哋去到曼谷機場嗰陣，見到迫滿晒人，原來好多飛去布吉嘅班機都轉飛咗去曼谷，航空公司叫大家喺機場等消息，睇吓布吉機場幾時開番，但我打過電話去布吉，知道我哋本來入住嗰間新酒店ByTheSea俾海水浸到去一、二樓，所以決定留番喺曼谷算數。」
愛兒喜潛水
其實車淑梅計劃於平安夜或聖誕節當日出發到布吉，後來因要參與平安夜當日下午舉行的港台活動，同場還有黎明和陳方安生，故將出發日期押後至昨日，車淑梅昨談及此事時不禁抹一把汗說：「今次真係不幸中之大幸，我哋本來book嗰間酒店喺海邊，而我個仔好鍾意潛水，去到布吉佢一定會走去潛水，如果我哋早咗一、兩日出發，𠵱家都唔知會沖咗去邊度啦。」
車淑梅一家今次逃過一劫，豈非要多謝黎明？她感慨地說：「可以咁講，我哋逃過大難，當然覺得好好彩，但聽到有咁多死傷，個心真係好唔舒服，今個聖誕假期，係我咁多年以嚟最唔開心嘅一次。其實我哋香港電台另一個同事王雅文，噚日同兩個囡囡跟美麗華旅行社飛咗去布吉旅行，我試過打電話畀佢，但又聯絡唔到，唔知佢哋安唔安全，真係好擔心。」記者其後致電美麗華旅行社查詢時，得悉所有旅客均無恙後，再轉告車淑梅，她始放下心頭大石。
肥姐大馬重演歌舞劇
此外，雖然遭印尼海嘯波及的東南亞國家甚廣，但不少藝人於聖誕前後均在大馬開騷，沈殿霞、葉麗儀、劉雅麗和葉振棠等，大前晚便在雲頂雲星劇場公演《麗花皇宮》歌舞劇，吸引逾六千觀眾捧場，也許是佳節當前的關係，肥姐在台上竟感觸地表示她開心背後其實隱藏着不快樂，又慨嘆自己一生從未穿過婚紗入禮堂，令她十分遺憾，而肥姐在演出後已轉飛內地橫店。另一方面，台灣歌手伍思凱與張信哲大前晚則在吉隆坡舉行《信想思成慈善平安倒數夜》，張信哲的父母更有到場打氣。
採訪：戴彩煥
