永義國際（1218）以往耐唔耐就伸手，抽水抽到你驚，但睇長期走勢，又波平如鏡，甚至沙士之後，都係未郁過，呢隻股，可以細細注、大大聲。
永義喺周一（20日）公布05年中期（9月止），純利7590萬元，增長32%，形勢大好，主要係多咗一筆證券投資未變現收益2867萬元，及一項出售附屬公司獲利3088萬元，中期每股純利6.75仙，講緊係現價0.142元一半水位，就算下半年冇乜着落，賺得2000萬元，全年計數，每股純利8.2仙，加權平均PE都係講緊得1.7倍。
永義02年最高見過1.38元，其後進行過10合1及3次供股，最近一次供股係今年5月，因合股同供股，衍生要錢唔要貨，又或者高位走唔甩效應，現水位應該幾乾身，冇乜散客貨，資產折讓又去到7成以上，沙士之後，又未認真郁過，若然唔係等煲薑醋，又等乜？
和記行（720）最近一個月成交開始活躍。又講兩點：第一，和記行核心業務之一，係空調及冷凍產品代理，除咗係LG品牌代理商，重係三菱重工中、港、澳獨家代理。呢期濠江賭權開放，百業興旺，未來兩年，計劃中興建大型賭場、酒店以至房地產項目，為和記行空調業提供龐大商機，兼且因涉及新造項目趕工，唔分春夏秋冬，排除季節性因素，濠江天時、地利對和記行極之有利。
第二，和記行最新市價不過3.6仙，但每股資產值0.116元，每股資產折讓69%，有炒資產折讓條件。嚟緊呢個星期，若然有異動，跟一轉無妨，但上落車都記緊一個字：「快」！
錢雋