公關小YY因為工作太辛苦，○二年尾就辭工不幹，一個屈尾十就走咗去瑞士攻讀酒店管理文憑，畢業後去咗倫敦搵工，眨吓眼已在五星酒店做咗一年。十二月初回港度假，聖誕前就飛返倫敦，問佢點解唔留在港與家人度聖誕？佢話：「做酒店工就係咁嘅啦，人哋放假慶祝，我哋就返工當值，聖誕日要在酒店留宿㖭。」咦，係唔係生意好得滯，要加班，唔返得屋企呀？
酒店小YY話：「倫敦喺聖誕日，一片寂靜，公共交通放假，根本搭唔到車返屋企，坐的士又太貴，酒店唔肯津貼，咪索性開放房間畀我哋瞓一晚囉。聖誕節係倫敦酒店嘅淡季，入住率好低，橫掂大把房冇人住，畀我哋用，根本冇乜成本。」如此說來，聖誕節去倫敦，酒店應有優惠價，不過人哋放晒假，市內冇氣氛，做遊客都冇癮。
做酒店工，入行比較難，打破關口，有咗經驗之後，現在全球酒店就業情況非常唔錯，轉工唔算困難。小YY預備橫渡大西洋，離開倫敦，走去紐約返工。佢信心十足，話一定搵到喎，趁年輕，去過世界兩大城市打工，積累充份國際經驗，兼且能說流利英語、粵語、普通話，以後返嚟香港，應該唔會踎墩啩？
計劃好則好矣，可惜酒店呢行，人工唔算高，以同樣教育背景，同樣年資計，銀行工嘅薪水就高過酒店工好多。財務Y二十年前係大賓架，之後俾酒店老細挖角，改行負責酒店管理高層，做控股公司執行董事，睇住旗下啲酒店。據財務Y講：「我兩行都做過，梗係知道薪酬嘅分別呢，小YY去倫敦、紐約打世界波，其志可嘉，希望佢唔好怨薪酬比較微薄啫！」講真，倫敦、紐約曼哈頓啲租金高到飛起，除稅後嘅薪水，分分鐘唔夠交租。