許志安前晚平安夜認真唔平安，佢喺九展舉行平安夜音樂會，同近五百位歌迷一齊狂歡，點知仆低咗兩次，幾瘀皮。
安仔請咗劉浩龍、鄧健泓（Patrick）同方力申做嘉賓，幾個不斷取笑安仔同鄭秀文（Sammi）嘅緋聞，Patrick問安仔：「你最鍾意Sammi…邊首歌呀？」佢未講完觀眾已經狂叫《捨不得你》，安仔就話Sammi唱《幸運是我》最好聽。
到許志安同劉浩龍傾偈時，攞番何韻詩嚟講，搞到劉浩龍忍唔住推佢一下，咁啱安仔隻腳攝咗入沙發，失去平衡成個仆低，後來安仔唱緊歌，落台同觀眾握手擁抱時，又成個膝頭撞落個大喇叭度，即時跪咗喺地。事後佢話呢排好黑，日前踢波先整親腳。
而同原子鏸分咗手嘅鄧健泓，前晚帶埋愛犬seth出現，佢話呢一年應晒沖太歲嘅嘢，各方面好唔順利，多得安仔安慰佢。
此外，安仔噚日去尖沙嘴出席商台活動，應大會要求預測自己「叱咤樂壇我最喜愛的男歌手」名次，最初佢話自己排第三，但喺台上聽到歌迷大叫後就話：「由於群情洶湧，加上再借咗運，所以都係應該第一位喇！」
噚日無綫喺奧海城舉行「普天同慶報佳音」，其間宣布明年將推出兒童節目《放學ICU》接替《至NET小人類》，譚玉瑛繼續做主持，喺節目度做校長。無綫資訊文教科經理蕭惠雄強調，譚玉瑛留任並非受到輿論壓力，而且譚玉瑛連續十年穩坐兒童節目最受歡迎主持，所以絕對重視對方。譚玉瑛話：「我嘅合約到明年三月，我做得開心就做，如果有一日唔開心就唔做。」
林保怡噚日聖誕節搞咗個處男簽名會，吸引近二百名擁躉到場，林保怡又玩遊戲又唱歌，好開心，佢話：「我以前有同陳慧珊一齊搞過簽名會，但一個人嘅就第一次。」保怡話今年聖誕好感受到節日氣氛，因為佢做嘅工作都好輕鬆。保怡話佢聖誕夜會同女友食飯，但禮物就唔記得買，因為呢排煩緊新屋廁所天花滲水，因為樓上爆水管喎。
劉德華舊愛喻可欣同媽咪前晚離開台灣去美國，喻可欣最近寫好新書《情海星空──我與劉德華》，書裏邊會大爆同華仔嘅秘聞，喻媽媽在機場講到華仔讚不絕口，喻媽媽話：「華仔是個努力的人，當時我也贊成他們在一起。」但華仔嘅歌迷就喺網上狂鬧喻可欣：「難道與天王的一段情，是這老女人僅存的唯一價值嗎？」
粵語長片中專做衰人嘅麥基，原來信咗主後，做咗傳道人。佢前晚平安夜喺沙田搞咗個分享會，麥基話佢十六年前未信主，成日頭痛，折磨咗成年，有日祈禱話如果唔痛就信主，點知真係唔痛，最後佢亦遵守諾言。今年七十歲嘅麥基喺○○年再婚，佢老婆細佢三十幾歲，麥基話：「我同佢係主嘅安排，起初佢唔信，後來我哋都一齊，重一齊搞好教會事業。」
女生宿舍噚日出席聖誕活動，佢哋早前出席無綫頒獎禮，喺後台巧遇梁詠琪（GiGi），有報道指話GiGi當時勒令正喺度影相嘅女生宿舍「彈開」，女生宿舍話當時GiGi企喺旁邊，但就冇聽到佢叫佢哋彈開。佢哋話自己入行以嚟都未試過遭受白眼，當日GiGi亦都有同佢哋打招呼，佢哋話：「可能我哋成日紮紮跳，見我哋彈吓彈吓，就叫我哋彈開！」
