由美國華裔精英組成嘅「百人會」下月首次喺香港舉行「第一屆大中華區峰會」，會邀請美國多名政商名人來港出席。
峰會雖然係第一次搞，但係主講嘉賓就粒粒星，除咗美國前國防部長佩里外，百人會成員何大一、雅虎創辦人楊致遠、賽貝斯主席程守宗等都會出席演講；而科技大學校長朱經武、恒隆集團董事長陳啟宗及利豐集團主席馮國經，更會以主人家身份，主持不同議題嘅會議。
若果大家唔明點解可以請到咁多名人，就要講吓歷史，百人會係由貝聿銘與馬友友等傑出美籍華人喺九○年創立，屬無黨派、非牟利嘅華裔精英團體，宗旨係加強中美兩國人民嘅相互理解，為美籍華人爭取更多機會，而且入會重要會員推介，保證全部係知名人士，搞研討會自然有質素保證。
傳真︰2623-9278
電郵︰