聖誕節相信一定有唔少Party等你去玩。不過你有無試過開一個另類Party？一個專為機迷而設嘅GameParty！一班人圍住一齊打機，熱鬧程度絕對會比一般Party有過之而無不及。而一個好Party當然要預備幾隻好Games，若果能有齊以下「Party」Games招呼親朋，氣氛更係一流。
記者：許福合
攝影：陳陶鈞
ImageGirls：小惠、Mandy
要喺Party出得大場面遊戲，當然既有靜又有動，筆者就精選咗近期4款人氣Games，全部都屬對戰類型嘅遊戲；多人齊玩嘅有《MarioParty6》同《EyeToy：跟猴子玩吧！》，而「隻揪隻」亦有《高達VSZ高達》同《WE8》，不論大型、小型聖誕Party，搞氣氛同樣一流。
《MarioParty6》迷你遊戲大亂鬥
齋睇GC《MarioParty6》個名，就知專為開Party機迷而設嘅遊戲，今集仍然係主打4人大戰PartyMode，有玩過上集都知道《MarioParty》以大富翁式決勝負，雖然新作大同小異，不過就喺多處地方加入小改動。例如新增黑夜同白晝，每次轉換場景都會有些少變動，並且加入新角色同有更多迷你遊戲；當進入各種精采MiniGames後，會隨機出現4人對戰模式，又或2對2、1對3等玩法。筆者跟一班朋友玩過一輪後，印象較深刻有派信、炸彈車等，另外一啲考眼光迷你Games亦好有趣，令到玩家等待時間大大縮短，玩落就知無冷場。同以往一樣，要喺遊戲勝出仍然係努力收集星星，考驗玩家反應智謀。
對應機種：任天堂GameCube
售價：約$380（美版）
新加嗌咪讀字玩法
今集最特別當然係加入咪高峯玩法，只要進入MicMode，就會改為用咪玩。一開始，過程就好像問答比賽一樣，可預先選擇問題類型，有估圖、記憶、辨別等問題，各自由LV1開始，想玩記憶，向住咪讀出「Memory」就可進入該類遊戲，玩法亦以讀字為主。筆者持別推介有小朋友參與Party玩MicMode，大家圍埋大呼小叫，夠熱鬧，又會玩得特別開心，兼且可學埋英文㖭！即使大人見到，亦會學足卡拉OK咁出現搶咪情況！不過要留意，美版會辨認英文讀音，若然係日版，就要讀出日文先玩到，相信會考起唔少人，買Game之前就要留意喇！作為Party遊戲，《MarioParty6》可以話近期首選！
對應機種：任天堂GameCube
售價：約$380（美版）
《EyeToy：跟猴子玩吧！》搖身搖勢捉馬騮
幾個人圍住齊齊玩大富翁，氣氛的確幾熱鬧，除咗任天堂有《MarioParty6》之外，PS2亦有隻《EyeToy：跟猴子玩吧！》撐場，而且重係一款對應視像鏡頭EyeToy嘅遊戲，另有一番新鮮感！基本操作方法好簡單，擺好EyeToy個鏡頭作感應動作後，再用「手」拍打右下角「輪盤」，轉動輪盤決定步數，同一般大富翁式遊戲差唔多，只係用EyeToy作為操控方式。遊戲中會以猴子代替金錢，收集某數量猴子才能往一下關進發。
之所以列入PartyGames，皆因可4人對戰；當巧遇對手立即會進入迷你遊戲，間中還會強制要其他人加入，絕對唔會有無聊嘅等待時間！迷你遊戲超過30種，較好玩嘅有擦掉嗶波猴抹在地板上腳印、賽跑、跳高、打棒球等，當中既講求鬥智，又要鬥反應，事關你再唔係用手掣，而係玩緊EyeToy，誰眼明手快就可勝出！保證大家都玩得非常熱鬧。
對應機種：PS2（須EyeToy）
售價：約$308
《高達VSZ高達》拍檔出擊講求戰術
《高達VS》系列喺街機勁受歡迎，新作移植到PS2上亦賣個滿堂紅。呢款2對2式戰術遊戲，最令高達Fans高興係有齊各類新舊MS、MA機種，包括Z同ZZ高達。由0079打到去0088。遊戲並加咗「覺醒系統」，共分為可大幅提升攻擊力嘅「強襲」，可令受損機體復原嘅「復活」，以及提升機體移動速度「機動」等3種選擇，令戰鬥時戰術運用變得更重要。
這款高達之所以變得咁受歡迎，機體、玩法、操控當然重要，對戰模式更係精髓所在，雖然暫時香港PS2版未可以上網玩，不過單機版對戰模式亦好有睇頭，開Party時筆者就推薦選擇隨機選擇機體，既可有新鮮感，同時可拉近大家水平，機體勁唔勁完全「各安天命」，免致其中一人玩得熟而霸住部機。對打時各自要照顧電腦拍檔，實在令人手忙腳亂，不過畀個提示各位，只要大細機配合得宜，及懂得利用2On1優勢，絕對可橫掃派對。
對應機種：PS2
售價：約$420
《WinningEleven8》實況足球當睇波
PS2《WE8》內所有球員均會以真實名稱登場，對球迷來講可謂一大喜訊，雖然遊戲內外國人名稱亦會以日文顯示，不過比賽時球衣背面會寫上球員嘅英文名稱，可以跟住改番晒，認人再無難度！而亞洲版更會有大量亞洲球隊登場，雖然玩落差唔多，不過多幾隊球隊揀，玩家當然唔會介意。足球一直以來都係最受港人歡迎運動之一，男女老幼都一樣咁啱，或多或少都識番幾個球星，一班人玩起上來就特別過癮。足球Game勝在易上手，又有對戰模式，雙方可一較球技，隨時開始一場勁旅對戰，旁邊觀眾亦可當睇波，開埋盤口賭「薯片」！
對應機種：PS2
售價：約$390/$480（亞洲版）
售賣點：DreamStore
查詢電話：25753285
地址：灣仔東方188商場256號舖