今年聖誕，節日氣氛濃厚，噚日港股只得半日市，交投淡靜，部份濠江賭業股繼續獲利回吐，其中跌得最急，就係早前升得最勁的奧瑪仕（959），最低見過2.45元，收2.725元，仍跌16.15％，成交股數2.23億股，金額6.05億元。
奧瑪仕持有股權的希臘神話剛剛開幕，奧瑪仕股價就跌成咁，真係唔知攞景定係贈興。
去澳門除咗搞賭之外，重有乜嘢業務會受投資者歡迎呢？經紀陳話，有好幾間上市公司都話進軍澳門，但未必係搞賭，可能係地產都未定。前日股價急升28％後停牌批股的祥泰行（199），江湖傳聞集資所得，亦係去濠江發展。
另外，連續升咗幾日嘅冷門證券股美建集團（335），公司話唔知點解股價異動，市場則流傳公司亦係去濠江發展。小初覺得，美建向來冷門，街貨唔慌多，如果有消息配合，將股價推上並唔難。
美建噚日又升10.43％，收1.27元，成交金額588萬元。
慕容小初