荷李活藝人年年賺錢賺到笑，今年當然唔例外，電視節目《EntertainmentTonight》啱啱就總結咗今年邊個搵得至多，其中米路吉遜（MelGibson）憑自資拍攝嘅賣座電影《受難曲》賺到開巷，據估計，佢已經袋咗超過二億美元（約十五億六千萬港元），再加上套戲嘅DVD同影帶收入亦滾滾而來，輕易令佢成為荷李活今年最賺錢人士，而且呢個勢重會持續幾年㖭。
雖然史提芬史匹堡（StevenSpielberg）今年只係拍咗《機場客運站》，但係加埋主題公園同舊戲收入，佢起碼都賺咗約五億港元。男星方面，湯告魯斯（TomCruise）憑《最後武士》分紅就收到三億五千萬港元；而湯漢斯（TomHanks）拍《機》片同《北極快車》就賺咗三億一千萬港元；尊尼狄普（JohnnyDepp）亦賺到約二億二千萬港元，下年佢重可能賺多啲㖭。至於女星方面，奧遜姊妹花（TheOlsenSisters）每年亦有約二億港元嘅收入，加埋佢哋個人品牌嘅商品銷售額，條數都幾襟計。
另外，米路亦俾霍士新聞選為今年娛樂圈大贏家之一，其他入圍者重有ParisHilton、米高摩亞（MichaelMoore）同男星占美霍士（JamieFoxx）等等。