周星馳作品《功夫》前日打破了中西票房開畫紀錄，但該片已遭盜版，網民可用「BT」軟件進行點對點非法下載電影。港府昨日聲言會嚴打非法下載，不過星爺認為目前刑罰不夠重，呼籲政府加重刑罰。
周星馳自導自演的《功夫》前日開畫收了四百一十一萬，創下了中、西片的開畫票房紀錄，而在內地開畫日亦收一千萬人民幣，星爺昨日收到這喜訊時十分高興。不過，目前網上已經有《功》片和《天下無賊》的盜版出現，網民可用「BT」（BitTorrent）軟件進行點對點非法下載電影，政府表示很關注，聲言會嚴打非法下載電影，星爺昨日知道後，即呼籲政府要全力保障電影工業。
工商及科技局局長曾俊華昨日向傳媒表示會針對聖誕檔期的電影，處理點對點下載的侵權行為，海關與電影業及互聯網成立了工作小組，並以《功夫》作試點，若成功檢舉，將成全球首宗案例。在現行《版權條例》下，任何人發放侵權複製品，達到損害版權持有者利益，最高可被罰款五萬元及入獄四年。
星爺認為刑罰應該再加重，這才可起阻嚇作用，他昨日接受電話訪問說：「𠵱家侵權只屬於民事起訴，但我認為應該正式立法，侵權行為可以以刑事起訴嘅話，肯定可以更能保障電影工業嘅長期利益。希望政府可以知道，電影工業係一門好專業講求創意同藝術嘅工業，並唔係偏門行業，所以我希望政府能保障同尊重呢個工業嘅利益。電影業𠵱家係有好大隱憂，咁多盜版出現，唔多唔少會對《功夫》票房造成打擊，所以部戲可唔可以破票房紀錄，真係唔知道，希望政府可以體諒到電影工作者嘅心情，真係做番啲嘢畀大家睇吓。」
花了三年時間始完成《功夫》片，星爺自言是嘔心瀝血之作，但影片剛上映就被非法下載，難怪星爺心灰意冷地說：「有時真係有啲灰心，我用咗三年時間去拍呢部戲，用咗咁多心血，啲無良人一個唔該，搞啲盜版出嚟，又或者擺上網畀人免費下載嚟睇，咁搞法電影業重點樣生存落去？𠵱家電影工業已經喺去到水深火熱嘅地步，如果政府再唔嚴格執行，殺一儆百，再咁搞法，我都冇心機再拍落去，因為明知做落去都係嘥氣。」
而《天》片的出品公司寰亞電影的負責人莊澄則認為，港府能迅速打擊非法網上下載電影，肯定是一個好開始，他昨日在電話中說：「最近電影業界成立嘅救急小組，曾經同政府官員反映過，最急切是打擊網上非法下載，𠵱家政府即刻做嘢，我哋當然表示歡迎。不過要成功以刑事起訴會比較困難，但我哋業界已向政府提出，希望能盡快立法，將侵權成為刑事罪行，咁樣阻嚇作用會更大。」
採訪：陳月媚
