國家主席胡錦濤呢頭叫董班子團結，嗰頭田少已經同煲呔開火，好彩有關人士㩒得快，喺平安夜已經鳴金收兵，田少打電話同煲呔解畫，煲呔亦都唔再窮追猛打，唔係都幾難同阿爺交差。
不過有熟知田少脾性嘅中環商家話，田少講大咗唔係第一鑊，幾年前試過講聯繫滙率存廢，搞到要任總出嚟補鑊，今次呢隻鑊算細喇。
不過佢又同田少講番句公道話，煲呔係咪隻手遮天，三司十一局、行政會議入面個個心裏有數，呢位商家話，唔少喺外面加入政府嘅局長，唔多唔少受過煲呔氣，至於班行會非官守成員就更加唔使講，淨係睇陳智思喺飛哥節目講多兩句西九就俾人警告，已經知乜事。
但睇番今次件事，煲呔以柔制剛，田少搵錯時間發錯炮，今次喺阿爺心目中，係煲呔攞分定田少攞分，怕且都唔使多講，牌面上煲呔更上一層樓，機會又大咗。
其實田少為表誠意，唔應該淨係打電話畀煲呔，反正佢兩個都住喺山頂白加道，趁住噚晚平安夜，應該整定隻火雞，搵定支靚酒，請煲呔伉儷去食番餐，叫做擺番次和頭酒。但係原來白加道成日整路，好多時要單線雙程行車，唔知係咪咁，搞到佢哋車出車入時成日「冤家路窄」。抑或係掘得地多，影響風水，搞到咁多風波？
傳真︰2623-9278
電郵︰