約美少女在聖誕檔期行山困難重重，「我要開P喎！」、「約咗朋友去皇后像廣場影聖誕樹喎！」不忿遭明拒，惟有改變策略，行程改為郊外開P兼搵聖誕樹，夠特別啩！果然，二人即時興致勃勃，跟大隊出發直入大嶼山水口，喺松樹林搵聖誕樹後再接石壁郊遊徑，玩足半日預祝聖誕節。
記者：尹珊珊
攝影：林栢鈞 模特兒：Fion、Vivian（d8）
石壁水塘兩面觀
東涌市中心出發，乘巴士直達嶼南道石壁水塘，甫下車，兩美少女已被眼前藍藍水塘吸引，「原來呢度就係石壁水塘，OK有氣勢喎！」石壁水塘在60年代是全港最大水塘，截存了附近三面山嶺流下的澗水，景色秀麗優美，堤壩上睇景吹風、翠綠大草地奔馳，好愜意！Vivian見識淺，遙指山坡下方一幢幢小白屋問：「嘩，乜下面咁似渡假屋嘅！」惹得眾人訕笑，齊道：「小姐，石壁監獄有幾靚呀？」「唔係吖，個View對住海都唔錯呀！」女仔人家想住男子監獄，睇怕佢都係第一個。
笑笑鬧鬧，信步前往水口，越過種滿洋紫荊的林蔭道，約10分鐘見石壁燒烤場，近山坡處有小徑可接上石壁郊遊徑。沿前方引水道前行，一級級的流水猶如小瀑布般充滿生氣，難怪有行山友稱之為全港最美的引水道，值得一讚還有引水道旁的綠草地，設備認真一流，燒烤爐、野餐枱椅、晾衫架及健身設施整潔企理，絕對是合家歡的休憩場地。
罕見挺拔松樹林
相傳聖誕樹起源於16世紀的德國，德國人在聖誕節會到樹林砍伐松樹回家裝飾，我們今日找的聖誕樹就在引水道小徑右方的隱蔽叢林。「嘩，好似走入森林咁喎！」「之不過幾步之隔，景色同出面相差咁遠喎！」不多說，我們連忙取出預先準備的聖誕裝飾，打算為聖誕樹布置一番，但難度來了，這兒的松樹挺拔粗壯，每棵也高聳入雲，即使有姚明7呎6吋身高，人叠人也恐怕摸不到頂，惟有在樹幹稍作布置，總算認節又夠Fun。
「閃閃令彩帶？」「有。」「七彩波波？」「都有。」萬事俱備，即刻動手，Fion話頭醒尾，找到兩棵相距不遠的松樹，把彩帶披掛上樹幹；Vivian也沒偷懶，將七彩波波、金漆松果輕勾樹皮，不過動手時要小心，勿毀壞樹木。10分鐘後，一棵後現代獨一無二的聖誕樹即告完成，Fion第一個忍不住笑：「睇落似裝置藝術多啲喎。」並着攝影師舉機拍照留念。把裝飾拆下準備臨離開前，兩美少女不忘拾起片地的松果：「呢度有咁多松果執，用漆噴兩噴已經夠靚啦！」
高崗俯瞰藍寶石
拜別我們的「裝置藝術」，我們沿路折返至石壁郊遊徑入口，開始今日另一個行程。石壁郊遊徑全長5公里，難度不算高，屬老少咸宜路線。經過又長又直的石樓梯，再踏過遍布沙石的石級，手軟腳軟，終接上狗牙嶺山腰的小徑，在這兒，放眼盡是綠油油的植林區，游走樹叢間漫步，心靈特別覺得寧靜、舒暢。轉過一個又一個山頭，從高崗向下望，山下的石壁水塘宛如叢林中的一顆藍寶石，散發獨有的光芒。
朝鳳凰山舉步進發
續前行，往後路段沒樹蔭遮蔭，幸好近日天氣明朗清爽，有涼風微微迎面吹送，倒也不覺得辛苦。兩美少女看厭眼前青山綠草，嚷著叫悶：「𠵱，好似無乜嘢睇喎，有咩搞先？」行山的意義在於活動一下筋骨，攝影師腦筋轉得快，即時跟美少女提議：「你估睇戲咩，高潮迭起？嫌悶不如唱首聖誕歌啦！」就這樣，我們在一片歌聲中繼續緩緩進發，接近大半個小時後，巍峨的鳳凰山就在眼前，也意味離終點不遠。再走10分鐘，我們已到達昂平高原，也正是鳳凰山觀日出的最佳位置。稍休片刻，擇左邊林蔭小徑前行，越過茶園即到天壇大佛腳下，不久留，趕快回市區再開Party。
醫肚站
昂平巴士總站附近有多間小食店，補給醫肚大把選擇，美少女嗜甜，我們選一間名為龍輝荳品店的店子，讓美少女嘗嘗郊區獨有的山水豆腐花，接又點了腸粉、燒賣、車仔麵，總算慰勞餓壞了的肚皮。
交通
去程：東涌市中心乘11號巴士（平日$11.2、假日$18.5），嶼南道石壁水塘下車。
回程：昂平乘23號巴士（平日$16、假日$25）折返東涌市中心。
