領匯上唔到市，有人歡喜有人愁，中記把握呢個申請人落空嘅機會，促銷拆售緊嘅深水埗商場深之都，噚日登咗大版廣告，話今日開始，一連三日聖誕假期，出示領匯申請證明嘅頭十個買家，可獲八個巴仙折扣。
中記話，呢啲噱頭嘢，就好似發展商賣樓咁，不過蘭西聽落，呢個優惠就重手過發展商賣樓，中記話明，係照價單減八個巴仙。
以最細單位約五十呎計，都要一百萬，即係話，可以平八萬以上，並非噱頭咁簡單。不過，早前已經買咗，同埋冇認購領匯嘅買家，就認真唔抵。
深之都現時重係經營緊嘅龍朝酒樓，由投資者尹栢權，上月以兩億幾買入，由中記策劃拆售同日後招租。拆售緊嘅一至三樓五百幾個單位，賣咗三百幾個，有近四億回籠，平均呎價大約兩萬。
臨近年尾，工廈及工貿樓市況突然大勇，相信係買家追落後嘅原故，好似九龍倉嘅葵涌工貿樓都會坊，剛剛又有一層易手。
美聯區域經理李麗嫦話，二十三樓全層約萬四呎，成交價二千零五十萬，每呎近千五。今年以嚟，都會坊總共有五十六宗成交，比舊年嘅三十五宗，多出六成。
都會坊今個月初，都有兩宗全層成交，其中二十一樓，賣價近三千蚊呎，二十二樓就以呎價一千三百六，賣咗畀物流公司，剛賣出嘅一層，造價高逾七個巴仙。𠵱家發展商只淨番二十五樓一層可以賣。
今年經濟好番，市民消費情緒高漲，各商場大業主，都大搞聖誕活動，長實沙田第一城商場，以「雪地FUNFUN嘉年華」做主題，喺商場外，設置咗個大型真雪天地，等小朋友可以過一個白色聖誕。
同系和黃紅磡黃埔花園商場，都有真雪場地，招徠消費者。
另外，集團東涌映灣園，設喺中環嘅售樓處，又有飄雪樂園。今個聖誕，雖然到處白雪，但市民肯定唔會覺得寒冷。
蘭西收到讀者報料，話屋之島董事總經理黃志強，已經離職，於是向屋之島查證，發言人承認屬實，但唔肯透露詳情，只表示遲啲會有公布。
黃志強喺屋之島創辦人孫漢明手上接掌公司，都已經有好幾年，○○年樓市滑落期間，將總部由中環衡怡大廈，搬咗去皇后大道中九號，○二年就再搬去怡和大廈。本月初佢重請同事去澳門食法國菜，估唔到跟手就拜拜嘞。
有讀者指出，日前蘭西提到佳明控股陳孔明話集團喺廣西有投資，但就出錯咗百仕達羅雷嘅相，蘭西查番真係搞錯，作出澄清。
香港興業旗下興勝創建與第三者合資，以一億七千萬，買入九龍塘喇沙利道一至一E號住宅地盤。
地圖顯示，係方方樂趣幼稚園現址，預計用多億三發展，即係成個項目，投資額大約三億。
香港興業自從合作發展藍天海岸失利後，好少購買土地，只靠「食老本」，繼續發展大嶼山愉景灣地皮。
但係，最近審計署炮轟，部份愉景灣早期發展漏補地價，搞到香港興業頗為不愉快。
今次交易，大可轉移市場注意，將焦點由愉景灣，引去市區核心九龍塘，相信呢個地盤，第二日可以發展成貴重豪宅。
電郵地址：