平安夜半日市，日股掂檔，指數升百幾點，港股自由行，恒指跌40點。市場活動家無心戀戰，等過咗聖誕再戰鱷魚潭。
和黃C輪9663：和黃（013）有回吐，收70.75元，跌0.50元。C輪9663收16.3仙，散21%，唔係乾跌，有502球易手，銀碼近9千萬。9663明年2月中到期，槓桿率43.4倍（有效16.9倍）。槓桿率係兩面刃，勁贏係因為槓桿率夠大，勁輸亦係因為槓桿率夠大。炒輪，咪淨係睇槓桿率，要睇埋溢價，時日無多嘅輪，睇溢價比睇槓桿率更重要。9663溢價5.3%，即係話去到尾正股升唔夠5.3%，隻輪可以用嚟墊煲底。調番轉頭，如果正股升10.6%，隻輪可升2.1倍。
國泰P輪2227：國泰（293）收14.60元，跌0.20元，自然對P輪有利。P輪2227收23.4仙，急升19%，龍虎榜上排第2。隻輪重有兩個月命，溢價12.6%，槓桿率62.4倍（有效12倍），引伸波幅33.7%。咁大嘅槓桿率，表面睇落啱用嚟刀仔鋸大樹，但睇埋溢價同尚餘壽命，相信到尾把刀仔鋸斷嘅可能性比較大。
豊采公司輪1115：豊采（764）收3.975元，跌1格，但公司輪1115收21.6仙，升35%，做咗龍虎榜阿1。隻輪明年6月夠鐘，負溢價4%，槓桿率18.4倍，睇數據，好抵買，不過正股市值19億元，值唔值？炒輪咪淨係睇股價，要睇埋公司個底。（文字專家話，「豊」音「禮」，與「豐」唔同。「豐」音「豐」。以前利舞台有間食肆大「豊」堂，應該叫做大「禮」堂，不過人人叫佢做大「豐」堂。）
章盛