腳傷未癒出席頒獎禮
馮仁昭四圍超：梁漢文搵定靚衫襯柺杖

梁漢文（梁炳）日前綵排《勁歌金曲》時跌倒，右腳受傷送院縫針，佢噚日需要到將軍澳醫院覆診，梁炳擺咗個烏龍，以為可以拆線，但點知原來只係洗傷口。
梁炳睇完醫生後話：「傷口已經好咗啲，見唔到骨，傷口埋得幾理想，不過今日痛過噚日，醫生話可能傷口結痂關係，好番都有好深嘅疤痕。」梁炳仍要以柺杖行路，所以聽晚新城嘅音樂頒獎禮都要搵啲襯得到嘅衫上陣，對於冇去拜梅艷芳，佢就話：「我跪唔低，會再補拜。」

再見亦是朋友
此外，梁炳、Kary、Stephy、古巨基同方力申前晚喺灣仔會展出席商台音樂會，梁炳嘗試唔用柺杖企住唱歌，但只係維持咗一陣。對於日前有教育學院女學生同男朋友分手，俾舊愛用𠝹刀𠝹臉，基仔話：「我聽到都毛骨悚然，愛嘅反面並唔係恨。我同以前啲女朋友個個都做到再見亦是朋友，我覺得法律要重判傷人嗰個人。」

鄭中基演繹黃霑作品
為咗紀念一代詞人黃霑，環球同EMI等唱片公司特別推出「『笑傲江湖』黃霑傳世經典」紀念CD，裏面除咗收錄五十一首霑叔嘅經典歌曲外，原來重收錄咗霑叔一首從來未發表過嘅作品，歌名叫做《少年夢想》，而呢首歌重搵咗鄭中基演繹㖭。

余文樂送手表賀聖誕
余文樂日前喺銅鑼灣出席「AXISx余文樂潮流迎聖誕迷你音樂會」，同大批歌迷慶祝聖誕，阿樂除咗獻唱幾首新歌之外，重即場送出四隻手表同簽名CD畀歌迷做聖誕禮物，而好友董敏莉亦都到場獻唱為佢打氣，兩人重同歌迷大玩遊戲。

關心妍做音樂冇白費
關心妍（Jade）同吳浩康噚日喺商台接受《叱咤樂壇》訪問，最近有指二人將會分別奪得四大聯頒嘅卓越表現金同銀獎，Jade說：「都係傳聞啫，未知係咪真，咁攞到金獎梗係開心啦，代表畀心機做音樂係冇白費嘅。」

陳霽平聖誕結新歡
陳霽平噚日喺中環出席「平安夜義賣愛心熊寶寶」活動，問到佢有無同緋聞男友韓尚志交換禮物時，佢話：「我哋只係普通朋友，重未去到可以交換禮物嘅地步。」陳霽平重話近排識咗個圈外男士，不過識咗唔係好耐，唔知對方有無意思。