唔好睇效力德甲聯球隊史浩克04嘅巴西前鋒艾列頓噸位十足，原來佢最鍾意參加牛仔競技表演；無論係騎野馬抑或蠻牛，都係佢嘅強項，凡係球隊有長假期，佢都會返巴西大顯身手。
喺德甲聯歇冬期間，艾列頓就因為參加牛仔競技表演而墮馬，重整斷咗兩隻手指。不過，艾列頓一於冇有怕，重話好番就會即刻再玩過。史浩克就梗係唔高興啦，但由於佢哋同艾列頓所簽嘅合約中，並冇列明唔俾艾列頓玩牛仔競技，所以都好無可奈何。史浩克嘅總經理艾沙亞就話：「由於合約中冇列明，所以我哋今次唔會罰艾列頓，不過牛仔競技表現呢啲咁危險嘅運動，我哋會勸喻艾列頓喺他日掛咗靴之後先至玩。」
其實艾列頓身為職業足球員，如果佢想職業生涯長久啲，都係唔好玩埋咁危險嘅運動，而且佢目前重係史浩克嘅球員，史浩克仍然係佢嘅米飯班主，既然老細唔like，咪唔好玩囉！
車路士領隊摩連奴建議，英超應效法歐冠盃同其他歐洲地區聯賽，准許後備名單由五人增至七人，等領隊調兵有更多選擇，唔想其他後備球員因名額有限，坐喺觀眾席上睇波。我求大俠認為摩連奴有道理，但係呢個條例對大球會有利，後備兵源質素唔高嘅中小型球會幫助唔大。
近排英超聯球員喺球隊聖誕派對上成日搞事，重愈搞愈嚴重，連職業球員協會（PFA）嘅行政總監哥頓泰萊都頂唔順，出嚟呼籲球員要生生性性，如果唔係遲早連球會聖誕派對都冇埋。其實今屆好似紐卡素同車仔等英超球隊已取消咗聖誕派對，哥頓泰萊咁講絕對唔係危言聳聽。
記唔記得之前我求大俠講過「肥仔嘜」加斯居尼為做慈善節目學溜冰，結果撞親頭入院，要由前阿仙奴龍門施文頂上。雖然施文年過四十，不過身手就好過加斯居尼好多，喺節目於星期三錄影時，同靚女明星拍檔蘇娜不知幾夾，兩人係冰上翩翩起舞，重贏得全場掌聲㖭！
二○○四年巴西最佳運動員已經出爐，得主係邊個？朗拿度？錯！朗拿甸奴？卡卡？都唔係，而係馬拉松跑手迪林馬。迪林馬就係今屆奧運男子馬拉松末段領先時畀一名觀眾騷擾損失咗二十秒，最後力追得銅牌嘅跑手。佢今次當選，我求大俠就覺唔多唔少都有啲同情分成份。