天水圍北現有人口約十五萬，惟有居民投訴，交通網絡不足，至今天水圍北仍未有公共交通直接連接東九龍及尖沙嘴，須「左轉右駁」，浪費時間。運輸署回應居民投訴時官僚十足，聲稱為免市區繁忙地區交通擠塞及製造廢氣，故避免開辦過多「點到點」直接公共巴士服務，無意為居民研究解決方案。
天水圍北居民蔡小姐稱，來往九龍的巴士，大部份均不駛經天水圍北，只有一條路線直達大角嘴；以致天水圍北居民，要轉駁多程車才可出九龍。「我每日都要搭車出尖沙嘴返工，抑係要坐一程輕鐵到頌富商場嘅巴士站搭269B線巴士，抑係到大欖轉車站轉車出去，好唔方便。」
她說，天水圍北多個屋苑陸續落成，人口不斷增加，惟現時沒有公共交通直接出九龍。
「政府就照顧到天水圍南居民嘅搭車需要，呢啲新開發地區就冇交通網絡，係厚此薄彼！」
居於天水圍北天恒邨家庭主婦陳太埋怨，她丈夫出九龍上班要「左兜右兜」。「佢做三行嘅，要去唔同地方返工，如果出九龍就要坐輕鐵或巴士到天水圍南，再坐巴士或西鐵出去，嘥好多時間！」
天恒邨另一居民梁先生稱，「搬入嚟兩年幾，都冇車直接去尖沙嘴同埋觀塘，要左轉右轉，起碼比天水圍南居民嘥多成個鐘先出到去。」
運輸署就天水圍北居民投訴函覆本報查詢稱，避免開辦過多「點到點」的直接公共巴士服務，有助紓緩特別是市區繁忙地區的交通擠塞，以及減輕汽車排放過多廢氣造成環境污染等問題。
覆函稱，天水圍北居民除可利用大欖隧道巴士轉車站轉乘其他交通工具往返九龍外，也可乘搭九巴及城巴於天水圍北開辦的線路，包括264M（往青衣）、265B（往大角嘴柏景灣）、269D（往沙田瀝源）、276A及B（往上水）、967（往金鐘）等，以及N269及N969通宵線往美孚及天后等。（一二一四○○八）
元朗區議會交通及運輸委員會委員周永勤指出，天水圍南及北是以天榮路為分界，天水圍北包括天頌苑、天富苑、天華邨、天悅邨、俊宏軒、天恒邨、天澤邨、天逸邨及天恩苑等，居民早於四年前陸續入伙，現時人口約有十五萬。
他說，「現有嘅巴士線路好零散，唔夠全面。冇直接車出尖沙嘴同東九龍，居民定要轉車，但係繁忙時段，巴士已經喺元朗同天水圍南上滿晒，佢哋根本迫唔到上車，結果要等幾班車先上到。」
周永勤認為，延長原有行走天水圍南巴士線並不可行，「唔可能『一線走天涯』，因為延伸咗原有嘅巴士線路，只會令巴士喺天水圍左兜右兜，成個鐘都未出到區外，只有分拆南北兩條獨立線，先至可以紓緩到𠵱家嘅問題。」
服務熱線
電話：29908288
傳真：23702192
電郵：
