領匯上市失敗，不知何時再來，聽講快則三個月，遲則半年，最希望盧婆婆大發善心，立即去終審庭上訴，等件官司早日告一段落——當然假設係盧婆婆輸梗。假如佢贏嘅話，全港精英律師跌晒眼鏡，以後唔識睇法律文件。但是盧婆婆好整以暇，歎慢板嘅話，大家安心等到雞年先至算啦。
既然領匯冇得玩，眾人紛紛放假鬆人，冇人理會領匯。一位仁兄臨上飛機，對左丁山講：「總結經驗，查找不足，係胡主席訓詞。我諗咗好耐，總結經驗，就係啲英國佬好衰，臨走留下好多衰嘢，拎走咗啲好嘢，最曳嘅嘢就係佢哋偷埋senseofhonour，拎返去擺喺大英博物館。」講得咁高深，唔多明，乜senseofhonour（榮譽感）都可以俾英國人偷走嘅咩？黃面孔冇呢樣嘢㗎？要問吓陶傑呢位英國通先至掂。
照理領匯咁多賓架律師精英做顧問，粒粒皆星，直情係一隊阿仙奴或車路士，阿婆係公屋綜援戶，市井出身，等於英格蘭業餘球隊，踢丙組都冇資格，點解會在足總盃第一圈就淘汰阿仙奴出局㗎？上述呢位仁兄查找不足，語重心長咁講：「阿仙奴球星如雲，但唔係由雲格做領隊，而係有一個教練團，內有牛津劍橋哈佛耶魯博士，全部未落過場打波，係要搵亨利打中堅，蘇金寶踢中鋒，阿婆雖然係業餘球隊，但由告魯夫帶隊，比利、碧根鮑華做訓練員，相形之下，阿婆咪用把餐刀偷襲裝甲兵團成功囉！」
仁兄講得笑中有淚，都唔知係唔係嘅。聖誕已到，寬恕為本，讓一切紛爭隨聖誕鐘聲而逝，大家好過冬，寧靜片刻先啦。