小初噚日打開報紙，見到雞乸咁大隻字話有賭仔喺金沙自殺，心諗似乎對澳門賭業股唔係好吉利。本來炒得㷫烚烚的幾隻濠賭股都出現回吐，但仍然有新力軍加入，最矚目當然莫過於大廚主理的大華國際（600）。
大華批完股之後，噚日復牌股價勁升97％，收0.66元，成交股數高達3.06億股，金額1.62億元。經紀陳話，M君今次落場幫手，果然不同凡響。
至於打正黃金旗號的邁特科技（1031），復牌當日股價勁升，但之後連跌3日。不過經紀陳話，人哋今次好大陣容出擊，唔會咁快就散場，應該會有後着。
邁特最高曾炒上過0.60元，但獲利盤湧現推低股價，噚日再跌5.43％，收0.435元。經紀陳話，最早睇起邁特的對沖基金，早在邁特以9.5仙批股時，已經坐咗成3億幾股，雖然邁特股價升咗好多，但聽講人哋重未食胡，而且在最近一次0.34元批股，再添食多2.9億股，家陣計落揸成7.82％，呢個基金咁長情，應該有啲嘢。
慕容小初