團夥無能，阿董慘遭壽爺在澳門面斥不雅，團夥尊嚴掃地，威信無存，各利益集團趁住呢個無政府真空狀態，即時掀起大騷亂！
自由黨頭目田北俊公開炮轟西九龍皇帝曾灶權，話佢勾結兩大地產商，搞西九龍，目的就係想兩大財團扶托做特首！
田少突然失控，又唔係冇道理！佢係唐唐嘅黨友兼保家，一心想撐托唐唐上位做下屆特首，呢樣嘢全世界都知！點知壽爺喺澳門會見兩屍十焗時，對唐唐面口冷淡，反為對煲呔財就親熱到爆燈，揸住隻手唔放，提前收皮老董，由煲呔財繼位，消息不脛而走！
田少等自由黨徒睇在眼裏，又點會唔急！為保唐唐上位，田少即時撲出，完全不顧儀態，指名向煲呔財叫陣，運用中國二千年宮廷流行嘅誅心之論，一口咬定曾爵士有用心、有野心、有居心，不惜拉埋長實及新鴻基落水，實行一刀將曾蔭權置諸死地！
田少假假哋都曾經係董團夥行正會議嘅一名人員，號稱「執政大聯盟」中堅，因為七七起義，率先反二十三條有功，玩殘董廢柴，今次故技重施，實行隊冧埋曾蔭權！重慌死煲呔死唔晒，上蓋、揼釘、鋪多層水泥，直頭話任何公務員都唔可以做下屆特首！
又點怪得煲呔扯火！唔做嘢，又話佢「投閒置散」，做少少嘢，又話佢有野心，中國式政治之險惡、刻薄、陰毒，曾爵士終於有所感受嘞！
不過田少咁暴力，又置黨中央嘅胡錦濤爺爺於何地呢？壽爺搵個人握耐啲手，嗰個就即時俾田少踩死！上次上京，田少俾壽爺同溫寶冷待，排隊影團體相，將佢擺到去山頭一角，命令佢企喺大專學生代表隔籬，壽爺虐待田少，冷待唐唐，熱呵煲呔，又唔怪得田少呷醋到今時今日嘅！
可憐胡錦濤猛叫董團夥及其外圍努力「團結」，原來呢班嘢內鬥最在行，互相踐踏，拳毆腳踢，血花四濺！廢董無能，家嘈屋閉，連土共今次都話田少離譜！
不過田少力捧唐唐，公然同壽爺對着幹，冇天地線，點敢膽大包天？唐唐後台，係人都知係前任國家軍委主席大隻江，唔怪得田少唔將壽爺放在眼內咯又！
傳真︰2623-9278
電郵︰